GIPASIGARBO ni Cebu City Mayor Tomas Osmeña ang iyang mga agi sud sa nakalabay nga duha ka mga tuig sa iyang pamunoan. Iyang gipahimug-atan ang giingon niyang agi sa ginadiling drugas nga maayo tungod sa paghimo og aksyon ni kanhi Cebu City Police Director Joel Doria.
Matod ni Osmeña nga tungod kini sa pag-aksyon ni Doria sa iyang nadawat nga text messages nga iya usab nga gi-forward ngadto sa kanhi police chief.
Dul-an sa P500 million ang nasakmit nga drugas sud sa pamunoan ni Doria hinungdan nga nakadawat ang kanhi city police director og dagkong mga pasidungog.
Apan si Konsehal Joel Garganera mibaraw kang Osmeña kalabot sa gipasiatab sa mayor nga tungod sa iyang mga gihimo, nagmalampuson si Doria sa iyang kampanya batok sa illegal drugs.
Matod ni Garganera nga wa gani mahatagi si Doria og sakyanan isip city police director sa Siyudad hangtod nahuman na lang ang iyang duha ka mga tuig nga pagkadestino sa siyudad.
Dunay basehanan ang mga pamahayag ni Garganera.
Sa pag-asumer ni Osmeña, ang hepe sa kapulisan mao si Sr. Superintendent Benjamin Santos. Dihang kalit nga gihulipan ni kanhi PNP Director General Ronald “Bato” de la Rosa si Santos, pwerteng sukoa sa mayor.
Niabot pa gani sa punto nga nihulga siyang kuhaon ang suporta sa kapulisan, sama sa allowances niini, nga naglakip na kang Doria.
Tungod sa iyang gibuhat, si Osmeña gitangtangan sa National Police Commission (Napolcom) og awtoridad sa kapulisan. Gibawian usab siya sa iyang tulo ka police bodyguards.
Nausab ang tonada ni Osmeña paglabay sa pipila ka mga semana.
Ang kampanya ni Doria nga Oplan Pokemon iyaha ra busa di angay mangangkon si Osmeña nga nagmalampuson si Doria tungod kaniya.