GUSTO sa nagkadaiyang local government units (LGUs) sa Metro Cebu nga himuong mas simple ug masabtan sa publiko ang bag-o lang gilusad nga Metro Cebu Earthquake Model (MCEM) atlas.
Hangyo usab sa Cebu Provincial Government pinaagi sa Disaster Risk Reduction Management Office nga palapdan pa ang maong mapa aron malakip ang habagatan ug amihanang Sugbo.
Kagahapon, gipangulohan ni Department of Science and Technology Undersecretary Renato Solidum Jr., ang paglusad sa MCEM atlas diin mao kini ang ikaduha human nila gilusad ang Philippine Earthquake Model diin nalakip ang Metro Manila earthquake model.
Matod ni Solidum nga gigama ang MCEM atlas aron makita sa mga propesyonal ilabi na kadtong mga engineer o kadtong maghimoay og mga istraktura nga palig-unan pa nila kini aro kon adunay kusog nga linog nga mahitabo sa Metro Cebu, di kini dali maguba.
Dugang niini nga mamahimong makamugna ang Central Cebu Fault System og 6.9 magnitude nga linog diin anaa kini ilawom sa yuta sa Metro Cebu gikan sa Minglanilla paingon sa dakbayan sa Danao ug lakip nga maapektuhan ang Balamban ug Toledo.
Kagahapon, pormal usab nga gitunol sa nagkadaiyang LGUs ug nagkadaiyang sector ang kopya sa MCEM atlas aron magamit kini nila sa ilang pagpangandam sa mga katalagman sama sa linog.
Si Baltazar Tribunalo sa Cebu Provincial Risk Reduction and Management Office (PDRRMO) nga ilang kopyahon ang maong atlas ug ilahang himuong simple aron mas madali nga masabtan sa mga nagkadaiyang LGUs sama sa munisipyo ug barangay.
Dugang niini nga mamahimo nga magamit ang MCEM sa Comprehensive Land Use aron mahibawo kon asa ang luwas ug angay nga palig-unan pa nga istraktura sa Metro Cebu.
Malaumon nuon kini nga malakip pa ang mga isla sa Bantayan ug Camotes sa expanded nga Cebu Earthquake Model.
Si Cebu City Councilor Dave Tumulak kinsa nidawat sa maong mapa alang sa dakbayan sa Sugbo nagkanayon nga ipatawag kadtong mga establisemento nga anaa malakip sa maapektuhan sa linog aron mas mapalig-on pa ang plano niini nga maminusan ang damages sa linog.
“Mao ni ang makahatag nato og guide sa atong katawhan sa ilang pinuy-anan katong dunay mga future plans pagbutang sa mga establishment ug building diha sa nagkadaiyang nga mga lugar sa siyudad sa Sugbo.Kabaw me nga di ni sayon tungod kay duna nay establishments nga naigo na daan niini karon, duna nay mga high rise building,” saysay ni Tumulak. (HBL)