MISMONG si kanhi Philippine National Police (PNP) Director General ug karon director sa Bureau of Corrections (BuCor) Ronald “Bato” dela Rosa nagbutyag nga naapil sa listahan sa mga narco-politicians ni Pangulong Rodrigo Duterte ang pangalan ni Second District, Maguindanao Province Assemblyman Sidik Amiril kinsa gi-ambush ang gisakyan niadtong Martes didto sa Barangay Cabantian, Davao City.
“As I can recall, naa na siya didto sa listahan, nadungog na nako iyang pangalan ‘yung PNP chief pa ako, naa gyod iyang pangalan sa listahan sa narco-lists ni President Duterte,” pagbutyag ni Dela Rosa.
Hinuon wala pa mihatag og pamahayag ang assemblyman labot sa pamahayag ni Dela Rosa apan usa kini sa ginatan-aw karon nga anggulo sa kapulisan kung may kalabutan sa ilegal nga druga ang nahitabong ambush.
Tungod sa hitabo, gimando na ni Chief Superintendent Manuel Gaerlan, Police Regional Office-Davao regional director, ang pagmugna og Special Investigation Task Group Amiril aron maoy motutok sa imbestigasyon sa pag-ambush sa sakyanan sa assemblyman.
Martes sa hapon, nakagawas na si Amiril sa ospital human kini nagpa-check up ug gidala na sab sa Pikit, North Cotabato ang patay nga lawas ni Berry Adas ang helper ni Amiril kinsa maoy naglingkod sa likod sa sakyanan atol sa pagpamanhig. (FTR)