KON mobisita naman lang gani mo og Palawan, di nimo angay palabyon ang mga nagkadaiyang island hopping sa usa sa maanindot nga dapit sa nasod.
Niingon sila nga ang labing nindot nga laagan sa Palawan mao ang El Nido, samtang ang Coron mao ang chill.
Apan kon ang na-book ninyo kay Puerto Princesa ug duha ka gabii ug tulo ka adlaw lang mo, ayaw nalang mo og biyahe sa El Nido kay unom ka oras, mas maayo kon taas inyong bakasyon aron di masayang ang oras.
Gawas sa sikat nga Underground River sa Puerto Princesa, ug makaadto ka, usa ning Honda Bay Tour nga angay usab nimo nga suwayan.
Tulo ka mga isla ang mamahimo nimo nga mabisita, akong number one tip kon wa kay dala nga snorkeling gears, pangabang.
Palawan really is a heaven underwater, didto nimo makita ang maanindot nga mga isda, kana kay base pud na nako ha nga snorkeling ra kutob.
Una nga gibisita namo ang Luli Island, gitawag ni nga Luli kay Lulubog, Lilitaw ni siya nga isla, giingon nga 40 porsiyento sa baybayon niini malubong sa tubig dagat inig taob.
Ayaw sipyata paglayat sa man made cliff aron inig sayom nimo sa dagat, makakita kas mga nagkadaiyang isda.
Kon di ka kahibaw molangoy, ayaw sab og kabalaka kay naay life jacket, maka-snorkeling gihapon ka.
Kay nagkuha mi sa package sa among resort, apil na sa among tour ang paniudto, ug sa Luli Island me nag-buffet lunch.
Ikaduha nga among gibisita ug mao kini ang labing ganahan nako nga mag-snorkel, kining StarFish Island.
Ayaw kaayo expect og starfish kay katong didto mi niadtong Mayo, duha ra akong nakit-an.
Mao ni ang island nga nindot kaayo i-snorkel, promise.
Ikatulo ug katapusan nga isla nga among gibisita ang Courie Island. Di kaayo nindot. Dili maayo for snorkel, ligo-ligo lang.
Tungod kay sa hotel namo gi-book among tour, P1,200 matag tawo ang bayad niini.