GISUGDAN na sa Davao City Transport and Traffic Management Office (CTTMO) ang pagpatuman sa 20-segundos nga parking period sa loading and unloading areas gamit ang yellow box alang sa mga depasaherong sakyanan sa mga gipili lang nga mga lugar nga dunay mga karatula.
Sa pakighinabi pag Huwebes, Hulyo 5, uban kang CTTMO head Dionisio Abude, matud niya nga di sama sa milabay nga semana, nga “information dissemination” lang bahin sa polisiya, ning higayona moisyu na sila og citation tickets alang niadtong di motuo nga mga drayber sa sumbanan.
Apan iyang giklaro nga sukad Huwebes, ang mga lugar lang sa mga dalang Magallanes, San Pedro ug C.M. Recto nga dunay mga yellow boxes ilang gipahimutang ang mga karatula nga dunay 20 segundos nga nagpasabot nga kini lang nga mga lugar nga ilang dakpon ang nakalapas.
Ang target nga mga lugar alang sa maong sumbanan mao kadtong mga lugar nga dunay suliran sa trapiko tungod kay pipila ka mga public utility jeepney (PUJ) drivers gigamit ang hununganan o loading zone isip terminal ug magdugay nga makamugna og kahuot sa dalan.
Hinungdan, aron nga malikayan ang maong insidente, ilang gipatuman ang 20-segundos nga gidugayon alang sa mga sakyanan nga magkarga ug magpakanaug og mga pasahero aron nga hatagan og higayon ang ubang mga pasahero. Apan dunay eksemted alang sa mga PWDs, buntis ug mga senior citizen.
Sa pagkakaron, naa sila sa proseso sa pagmugna og dugang traffic signage aron nga ipahimutang sa mga pinili nga lugar nga dunay yellow box. Matud niya Abude nga ang sunod nga target mao ang Uyanguren ug Matina duol sa NCCC Mall.
Sa dihang gipangutana kon dunay nangadakpan, sumala niya nga wala pa siyay datus bahin niini. Iya pang pangutan-on kon duna bay nadakpan sa yunit.
Multa nga P500 batok sa mga drayber sa pagbalewala sa traffic signs, pagbalewala sa traffic regulation, ug obstruction. (JCR)