Managsuong Abellar nanghawod

NANGHAWOD ang magsuong sila si Juvanni og Juvenille Abellar sa 1st leg sa 2010 MS Motosuit Motocross Series nga giulohan og “Capt. Manuel Wagas Motocross Cup” sa miagong adlaw sa sitio Tuburan, Jubay, lungsod sa Liloan.

Si Juvannie maoy naghari sa Expert Open category samtang si Juvenille maoy nagkampiyon sa bag-ong gidugang nga kategoriya nga mao ang Pro-Open.

Nagsunod kang Juvannie sa Expert Open mao si Jonjon Adlawan, kinsa miangkon sab sa ikatulong puwesto sa Pro-Open.

Si John Flores nikulit dayon og pangalan sa bag-ong kategoriya nga iyang giduwaan dihang naghari siya sa Intermediate category.

Human sa iyang pagdominar sa Novice division sud sa pipila ka mga tuig, si Flores dili na makaduwa ning maong kategoriya hinungdan nga nisaka na siya sa Intermediate.

Si Dongkey Sanchez maoy nikampiyon sa Local Enduro hasta sa Open Enduro unya si Jun Enriquez maoy nipatigbabaw sa Executive A ug Executive B.

Naghari sa Executive A mao si Roscel Gungob, si Nikko Redulla maoy kampiyon sa Beginners Open Production unya si Ryan Querol maoy midaog sa Novice Open Production.

Nipatigbabaw sa Pewee division mao si BJ Pepito samtang ang mikampiyon sa Mini Class mao si Gonaricci Cuesta. Ang lumba gisuportahan ni Lilo-an Mayor Duke Frasco ug mga sakop sa Sangguniang Bayan sa lungsod ug sa Castrol Power One.