GILAUMAN nga modaghan ang prebilihiyo sa mga barangay tanod tungod kay mas taas na ang standard sa pilion nga mahimong kaabag sa kapolisan.
Kini subay sa gikatakdang pagmugna og bag-ong hugpong sa mga tanod sa naglainlaing mga barangay ning siyudad sa Cagayan de Oro.
Nasayran nga buot ni Mayor Oscar Moreno nga sa dili pa matapos ang bulan sa Agusto ilabi na ang kapistahan sa dakbayan maplastar na ang bag-ong grupo sa barangay tanod.
Sa pakighinabi niadto sa Sun.Star Superbalita kang Kagawad Romeo Calizo, chairman sa Committee on Police, Fire and Public Safety nga gumikan kay mas standard na ang buot nga mugna-on nga bag-ong mga Barangay Tanod plano usab nila nga mas hatagan og daghang prebiliheyo.
Nasayran nga aduna lamang kini sila’y kasamtangang dawaton nga P500 matag bulan hinungdan nga plano nga hatagan kini og mga dugang benipisyo ilabi na nga wala pa’y insaktong budget aron sila hatagan gayud og posibleng sweldo nga pagadawaton matag bulan.
“P500, yes but we are thinking of other compensation just like insurance kanang free uniform nila ug kanang free gadgets, just like anang pito ug kanang batuta ug they’ll be given some privileges just like ang ilang mga anak mao’y priority sa mga summer job kay lisod pud biya ang kahimtang,” tipik sa pahayag niini.
Samtang gibutyag kaniadto ni Moreno nga ang ordinansa nga gihatag sa siyudad mao ang P500 apan ikonsidera kining pataasan gani sa kasamtangang gasto sa mga Barangay Tanod moabot na kini sa milyones ug gidugang pa niini nga kung buot gayud nga mahimong malinawon ang siyudad gahinan gayud kini og pundo.
“It’s not just limited to the pay, importante pa diha ang training, ang supplies nila and I would say nga kung tinuoron nato ni mogasto kita og even more than 25 million per annum just Tanod lang in additional expense ,dili ni sayon pero gusto nato nga malinawon nato atong dakbayan then ato gyud gahinan,” ang tipik sa pahayag ni Moreno atol sa nilabay nga press conference.
Sa pagkakaron hinay-hinay na nga gimugna ang maong bag-o nga set sa Barangay Tanod.