DULA karon (Hulyo 7, 2018) didto sa Initao:
9 a.m. -- Initao vs Naawan (Volleyball U18)
11 a.m. -- Naawan vs Manticao (Volleyball women LGU)
12 p.m. -- Initao vs Laguindingan (Volleyball women’s open)
2 p.m. -- Jasaan vs Tagoloan (Bball U18)
4 p.m. -- Initao vs Gitagum (Basketball LGU)
6 p.m. -- Lugait vs Gitagum (Basketball U25)
Nangdaug ang duha ka pambato sa Munisipyo sa Magsaysay pagdepensa sa balwarte niini kontra sa visiting teams atol sa Kuyamis Sportsfest Basketball League Governor Yevgeny Emano Cup niaging semana didto sa Magsaysay municipal courts.
Gituhik sa Magsaysay ang Talisayan agi sa 99-90 nga daug sa 25-under division, samtang daug sab ang Magsaysay seniors kontra sa Balingoan, 89-76, sa LGU division.
Nibangis si Real Butal sa kadaogan sa Magsaysay 25U pagkulit og 29 puntos, samtang nihatag sab si Ricky Macapas og 27.
Gidiktahan sa Magsaysay ang tanan quarters ug wala kini patilawa ang Talisayan og labaw.
Kanunay lang galakag ang Talisayan ug nakadikit kini sa tulo ka puntos sa pinaka hingpit nga biya, 72-75, sa third quarter.
Apan, gihugtan sa Magsaysay ang depensa ug nakakuha og igong distansya aron pildehon ang Talisayan.
Nibira sab si Bruce Porras og 24 puntos, samtang nihatag sab si Kier Estroga og 18 sa kapildehan sa Talisayan 18U.
Nangulo sab si Jushue Dena sa Magsaysay seniors agi paghuman og 23 puntos, samtang nihatag sab si Pet Mangunlay og 18.
Nikolekta si Kagawad Ronnie Panulaya og 27 puntos, samtang niabag sab si Kagawad Bong Santos og 20 sa kapildehan sa Balingoan.
Nasamdan lang ang Magsaysay pagdepensa sa balwarte niini human mapilde ang 18U nga pambato niini agi sa 56-65 nga kapildehan sa Talisayan.
Magpadayon ang tanan mga dula sa Kuyamis sportsfest karong Sabado diin ang Munisipyo sa Initao ang mag-host.