SILA Association for the Advancement of Karatedo (AAK) Davao's Ian Carlos Pascual ug Atsuko Kaiyel Tan ang pasidunggan isip athletes of the year (AOY) awardees sa umaabot 24th So Kim Cheng Awards karong Hulyo 22 sa The Royal Mandaya Hotel.
Kini na ang ikatulong sagunsong award ni Tan nga nadawat sa maong kalihukan.
Matud ni John Irene Del Campo, representante sa So Kim Cheng Sports Foundation, atol sa Davao Sportswriters Association (DSA) Forum gihimo didto sa The Annex of SM City Davao niadtong Huwebes, miingon, “She will receive her grand slam award. The eight-year-old purple belt karateka will also become part of the Hall of Fame.”
Midaug si Tan og platang medalya sa 7th Vietnam Open Karate for kata girl's 6-8years old sa Hanoi, Vietnam, ug plata sa 10th Kota Kinabalu Open Karate Championships sa Malaysia.
Nakaharbat sab siya og duha ka bulawan sa 6th Adidas International Karate Cup sa SM Mall of Asia ug duha ka bulawan sa SM Milo Super Karate Kids National Age Group Championships didto sa SM Seaside, Cebu.
Samtang bahin sa iyang amahan nga si Rommel, nagpasalamat sa SKCSF sa pag-ila sa mga kadaugan sa iyang anak.
“Syempre happy but I don't think she is ready for the Hall of Fame award, she is too young for that. But I'm always grateful,” sulti sa AAK Davao chief.
Samtang si Ian Carlos Pascual, mibulsa og bulawan sa 10th Kota Kinabalu Open Karate Championships sa Malaysia ug 6th Adidas International Open Karate Cup sa SM Mall of Asia bag-ohay lang.
Dugang ni Jerson Tamayo sa Dabaw Sports Council Inc. nga 17 atleta gikan sa 27 local National Sports Associations (NSAs) ang makadawat sab og dungog. (Marizz R. Perez)