HUMAN sa duha ka mga tuig ug tunga nga pagretiro, si Mexican Erik “El Terrible” Morales mobalik na’g away karong Marso 27, matod sa iyang promoter nga si Nacho Huizar.

Ang kanhi three-time word champion makigbatok kang kanhi lightweight champion Jose Alfaro sa usa ka welterweight nga away sa Monterrey, Mexico.

Click here for stories and updates on the Sinulog 2010 Festival.

Sa interbyu sa ESPN, nagkanayon si Huizar nga nagtuo siyang daghan ang naghinamhinam nga makasaksi og balik sa abilidad ni Morales.

“I think he’ll sell pretty good, but not like he did last time,” matod ni Huizar kabahin sa potensyal sa pagbalik ni Morales sa pay-per-view.

Si Morales (48-6, 34 KOs) nahimong world champion sa junior featherweight, featherweight ug junior lightweight champion ug kanhi gyud siya kinaham sa pay-per-view.

Katapusang nakapakita’g aksyon si Morales niadtong 2007 diin napilde siya pinaagi sa decisyon ni David Diaz.

Nagkanayon si Huizar nga mismong si Morales ang nitawag kaniya aron ipadayag ang plano niining mobalik og away.

“After I heard he was going to come back, he called me and begged me to be his partner,” asoy ni Huizar. “It’s an honor to me for him to pick me. If I don’t do it, somebody else will.”

Nagkanayon si Huizar nga unom ka mga away ang gipirmahan nilang kontrata, tulo karong tuiga ug tulo sab sa sunod tuig.

Sa katapusan niyang unom ka mga away, lima ka mga pilde ang naangkon ni Morales lakip na niini ang duha ka knockouts batok kang pound-for-pound champion Manny Pacquiao.