AC Martin

Tagming

WAY katug si direk Ruel Bayani kay mao gyuy nangunay sa final editing sa pelikulang “Paano Na Kaya.”

Chika ni Ma’am Josie Pereyra sa JSP Ads and Promo nga maoy nag-promote karon sa maong pelikula nga gahapon ra gyud nahuman ang shooting, hinungdan nga maglisud na silang Kim ug Gerald kon mangari pa silag Cebu.

Excited na ang tanan sa ABS-CBN kay lagi mao ni opening salvo karong tuiga sa Star Cinema. Showing na ugma, Jan. 27, ang “Paano Na Kaya”.

Kon mo-break ba ni og bag-ong record sa box office? Yan ang abangan!

CHILEN SHOWCASE

Atong mga pahalipay sa tanang nakadaug sa bag-o lang nahuman nga 15th Anniversary Superbalita raffle promo, labi na ni Rosalin M. Giltendez nga taga-Basak San Nicolas nga maoy nakadaug sa Chilen Chicharon Product Showcase balor P10,000.

Mahimo na kang mag-ablig sari-sari store ana day Rosalin ug ang halin maoy gamiton nimong puhunan sa uban pa nimong paninda. Kon-gra-chulay-shun!!!

KRIS ALLEN CONCERT

All systems go na ang “Musicfest 2010 Concert” nilang Kris Allen, Boyce Avenue ug ang The Jabbawockeez karong Pebrero 5, 7:30 pm sa SM Cebu North Annex Parking.

Ang ticket mapalit sa P5,268.00 (VIP), P3,160.80 (gold), P1,053.60 (silver) ug P526.80 (bronze).

Ni-email nako si Ma’am Jaja (usa sa mga tag-iya sa Vudu ug Formo) kay usa diay sila sa nag-promote karon sa maong concert.

LOVE LETTERS UPDATE

Sa gustong mangapil sa atong Love Letter Writing Contest ayaw na paabota ang atong February 11 deadline. Mas sayo ninyong mapada mas labing maayo.

Ang tanang suwat nga mapilian ato ning ipatik dinhi atol mismo sa Valentine’s Day plus naa moy madawat nga 48-sachet pack sa “jimm’s black coffee” (with Korean ginseng), cash prize ug ubang giveaways.

BALIK-AMERIKA

Balik-trabaho karon sa Amerika isip registered physical therapist ang producer-director-chairman sa BCB Production and Management nga si Bong Bantilan.

Apan nisaad ni nga mobalik ni sa higayon nga maplantsa na tanan ang sunod niyang project nga ipahigayon sa Cebu.

Gawas nga PT by profession, si Bantilan usa usab ka interior designer ug founder-organizer sa Mr. Cebu competition nga naa na sa iyang ikaduha nga tuig.