NAKAMUGNA og kahuot sa dagan sa trapiko sa mga motorista ug mga pasahero nga nagpadung sa habagatang Sugbo ug nagpaingon sa siyudad sa Sugbo ang pagpasemento sa Department of Public Works and Highways (DPWH) sa dul-an 800 metros nga karsada sa Barangay Perrelos, siyudad sa Carcar.
Nisamot ang kahuot sa trapiko sa dapit kagahapon sa buntag dihang nagbangga ang usa ka cargo truck ug multicab.
Kini samtang, sirad-an ang northbound lane sa N. Bacalso Avenue sud sa tulo ka buwan sugod karong Lunes alang sa phase 4 sa underpass project.
Si Carcar City Mayor Nicepuro Apura nihangyo sa contractor ug ni Engr. Leslie Anthony Molina, pangu sa Second District Engineering Office sa DPWH 7, nga himuong 24 oras ang pagtrabaho sa proyekto nga gisugdan niadtong Mayo aron madali ang paghuman niini.
Matod niya ang mga tawo ang mahasol kon dugay mahuman ang proyekto kay malangan kini sa ilang biyahe labi na karong gabii na ang iyang paghatod sa State of the City Address (Soca).
Apan si Molina nipasabot nga maglisod ang mga trabahante nga kanunay ipa 24 oras ang pagtrabaho kay dili na usab kini makatrabaho pagka ugma niana.
Iya hinuong gitahasan ang contractor sa P30 milyones nga road concreting project, ang AR Adlawan Construction, nga kon maayo ang panahon, mag-overtime ang mga trabahante aron kini mahuman sa wala pay Disyembre.
Gihangyo usab ni Molina ang contractor nga himuong pito ka adlaw na lang gikan sa 14 ka adlaw, ang curing sa karsada human masemento aron magamit dayon ug maagian og mga sakyanan.
Siya nipasabot nga ilang gitangtang ang aspalto sa Barangay Perrelos ug gipulihan og semento kay naukal na kini human masudli og tubig.
Siya niangkon nga giputolputol nila ang pagtrabaho gumikan sa presensiya sa dagkong mga punoan sa acacia, duna usab bahin sa karsada nga kurbadahon ug mosamot ang trapik.
“Di man ta ka pidpid og maayo kay naa may dagko kaayong mga punoan dinha nga naglinya gyud,” dugang ni Molina sa Superbalita Cebu.
Gawas sa road concreting, ang rehiyonal nga buhatan sa DPWH 7 nagpatuman usab og P200 milyones nga kantidad sa road widening project sa dapit.
Si Jonathan Tumulak, focal person on traffic management sa kagamhanan sa lalawigan sa Sugbo, niingon ang gagmay nga mga sakyanan gikan sa siyudad sa Sugbo ug nagpaingon sa habagatan adto moagi sa eskina sa Barangay Perrelos sa sityo Catugasan, moliko sa tuo dayon molahos hangtod sa Barangay Can-asujan dayon molapos sa Barangay Liburon ug mogawas sa Gaisano Carcar.
Samtang ang mga sakyanan nga dagku ug gagmay nga gikan sa habagatan ug mopadung sa siyudad sa Sugbo, mosubay sa national highway apan magpulipuli pag-agi sa gitrabaho nga dalan.
Samtang sumala ni Engr. Roy dela Cruz, project engineer sa underpass sa N. Bacalso Avenue sa DPWH 7, niingon dili maghuot ang mga sakyanan tungod kay ang southbound lane ug dan F. Llamas ablihan alang sa mga sakyanan.
Sa higayon sirad-an ang northbound lane atubangan sa Shopwise, ang dan F. Llamas ug southbound lane ablihan alang lang sa mga sakyanan nga paingon sa amihanan gikan sa alas 6 sa buntag hangtod alas 2 sa hapon. Samtang gikan sa alas 2 sa hapon hangtod sa alas 6 sa buntag, ang mga sakyanan nga padung sa habagatan ang moagi niini. (Dugang estorya ni SCG, RTF sa Sun.Star Cebu)