SA akong nahinabi sa mga nakatambong sa forum sa mga presidential candidates sa miaging Biyernes, daghan ang nakaingon nga hait manubag kini si Gibo Teodoro, ang kandidato ni Presidente Gloria Macapagal-Arroyo. Duna say nakasulti nga maayo sab ang performance ni Sen. Dick Gordon.

Samtang, si Gibo naghisgot sa iyang mga plataporma o mga planong buhaton kon maoy suportahan sa katawhan, si Gordon nipakapin og mga saway sa ubang mga presidentiable. Apan sa duha, si Gibo maoy nakakuha og mas dakong suporta gikan sa mga nanambong.

Click here for stories and updates on the Sinulog 2010 Festival.

Di na lang kita motuki kon duna bay hakot sa maong forum kay mao sab kiniy reklamo sa mga nagsuporta ni kanhi presidente Joseph Estrada. Iya kunong mga tigsuporta wa makalingkod ug makasalmot sa mock polls bisan og dunay tiket. Basta sa maong forum, si Gibo ang daw nangharos.

INTELLECTUAL

Sa akong pagsabot sa nahitabo, nakaingon ko nga si Gibo ang nakapabor niining positioning nga brayt kon itandi kang Gordon. Ang business community ug mga tinun-an (ubay-ubay man ang nangadto) mao man usab ang maingon nato nga intellectual voters.

Sa maong mga sektor sa katilingban, si Gibo ang nilampos sa pagkuha sa suporta labi na kon makadungog na kaniya nga personal.

Ang nakalisod lang niini kay pila ra man ang iyang maabot hangtod moabot na ang piliay sa Mayo? Mas daghan man ang di manambong og ingon niini nga mga forum.

COMMERCIAL

Kon maghisgot kitag paagi sa pagkab-ot sa mas dakong bahin sa populasyon, nagkompetensya karon sa kadaghan sa mga television ug radio commercial sila si Gibo ug Sen. Manny Villar.

Apan niining maong terrain sa propaganda, makaingon kita nga mas malampuson ang kampo ni Villar tungod sa kadaghan sa ads ug sa kanindot pagkahimo.

Makita nato ang kalampusan ni Villar diha sa iyang kusog nga pagsaka sa mga survey kon itandi kang Gibo, Erap ug Gordon. Si Villar karon ang nagkaduol sa survey ratings ni Sen. Noynoy Aquino.

Ang problema lang ni Villar kon unsay epekto kaha sa iyang ratings niining karambola karon sa Senado diin nasuko na si Senate President Juan Ponce Enrile kaniya tungod sa pagpangulo og usa ka kudeta.

Nibahad karong bag-o si Enrile nga iya gyud nga panitan si Villar tungod niining isyu sa pag-divert sa C5 ug ang pagdoble sa budget nga P200 milyones alang sa usa ka dalan. Tan-awon unya nato kon epektibo ba kini sa pagbabag sa pagsaka ni Villar. Sa pagkakaron, siya ang naa sa ikaduha nga posisyon samtang nag-una gihapon si Sen. Noynoy Aquino.

EVENTS

Gawas sa presidential forum, atong nakita sa miaging duha ka semana ng a aktibo sila ni Noynoy, Gibo, ug Villar.

Si Gibo nisalmot sa Suroy-Suroy sa Sugbo ni Gob. Gwen Garcia samtang si Villar wa paalkansi sa miaging Sinulog. Nianhi gyud siya sa Sugbo aron magpakita sa mga Sugboanon.