Nalzaro: Pasidungog para ni Cerge
DAGHAN ang nag-ingon nga anha nimo mahibaw-an ang maayong batasan sa usa ka tawo kon mamatay na siya. Kay diha nimo base sa gidaghanon sa mga tawo nga mopakita sa ilang simpatiya ug mohatod sa paglubong. Kon mao kini ang basihanan, dan maka-ingon ko nga maayo gyud nga tawo si anhing Press Secretary Cerge Remonde.
Liboan ka mga tawo gikan sa nagkalain-laing hut-ong sa katilingban. Si Pres. Gloria Macapagal Arroyo ug Vice Pres. Noli De Castro ang nitambong mismo og nihatod sa katapusang pahulayan ni Cerge. Daghang mga taga Argao ang na-anugonan ni Cerge. Daghan pa unta siya og ma-abot sa iyang propesyon ug ingon man matabang sa iyang yutang natawhan. Gi-angkon sa ubang mga pulitiko nga si Cerge maoy nahimo nilang taytayan sa ilang mga hangyo didto sa Malakanyang. Karon nga wala na siya, wala na usab silay kasandigan sa Palasyo.
PASIDUNGOG
Daghan ang nisugyot nga hatagan og pasidungog si Cerge pinaagi sa paghingalan og usa ka kalsada o edipisyo ba kaha. Daghan ang nisugyot kanako. Mao gyud kana ang among nahuna-hunaan ni Atty. Cheking Seares, editor in chief ning maong pamantalaan. Ang Citizen Press Council mao ang mohimo og lakang aron mahatagan og pasidungog si Cerge.
Si Argao Mayor Edsel Galeos nagplano nga ang gitukod nila nga public market ilang pahinganlan sa ngalan ni Cerge. Usa si Cerge ang nakatampo nganong natukod ang maong merkado.
Pero problema pa nila kay wala pa gyud kompletong ma-release ang kinatibuk-an pundo alang sa maong proyekto. Wala na ra bay maka-follow up niini kay patay na si Cerge.
NANGIHA
Na-unsa man intawon na usab kini si Mayor Tomas Osmeña nga nangiha naman pod og taga media. Gikiha ni Tomas si Atty. Seares, Sunstar reporter Rene Martel. Gi-apil sila ni Tomas sa kiha niini batok sa iyang kaatbang nga si Atan Guardo, kinsa magpapili pagkakongresista sa south district.
Ang isyo nga si Guardo namasangil nga ang City Hall nibabag sa iyang pagpanghatag og hinabang sa mga nasunogan sa A. Lopez, barangay Calamba. Ni-ulbo ang kaspa ni Tomas ug nikiha og libel batok ni Guardo. Apan gi-apil ang Sun.Star kay mao kuno nagpatik sa maong libelous statement. Aduna may ubang pamantalaan nga gapatik usab sa maong akusasyon ni Guardo, nganong wala man usab niya gikiha ang reporter ug editor in chief ning maong mga pamantalaan? Morag natuyok na gyod siguro ning utok sa mayor.
(bgnalzaro@gmanetwork.com)