MIPADAYAG og kabalaka ang pipila ka mga mayor dinhi sa lalawigan sa Sugbo nunot niining sunod-sunod nga pagpamatay sa mga mayor sa Luzon karong bag-o lang. Si Tanauan, Batangas Mayor Antonio Halili gipusil patay atol sa flag raising ceremony sa nataran sa ilang city hall. Ang mayor apil sa listahan sa illegal nga drugas.
Samtang si General Tinio, Nueva Ecija Mayor Ferdinand Bote gi-ambush samtang luwan sa iyang sakyanan. Wala pa matino ang motibo sa pagpatay. Wa siya sa listahan sa narco politicians. Niadtong miaging tuig usa ka mayor sa Maguindanao napatay sa mga pulis gumikan sa kalambigitan sa illegal nga drugas.
Matod pa sa taho nga 10 na ka mga mayor ang gipamatay sukad niadtong 2016. Pero ang uban napatay gumikan sa personal nga kasungian. Si Buenavista, Bohol Mayor Ronald Tirol gipusil patay sulod sa buwangan sa ilang lungsod niadtong Mayo. Matod pa pulitika ang hinungdan. Si Bien Unido, Bohol Mayor Gesila Bondiel giingong gipatay. Iyang bana nga si kanhi Bohol provincial board member Rey Nino Boniel ang suspek.
Si Tuburan Mayor Aljon Diamante, presidente sa Municipal Mayor’s League (MML) Cebu chapter, nabalaka. Mao usab si Talisay City Mayor Eduardo Gullas. Gipahimangnuan ni Diamante ang iyang mga kauban nga magmatngon og kon puwede, magbaton og bodyguards.
Kon wa mag-apil-apil ang mga mayor og binoang sama sa illegal, labi pa ang sa illegal nga drugas, wa silay angay kabalak-an. Kon limpiyo ang ilang konsensiya, dili sila angay mabalaka. Bisan maglakaw-lakaw sila nga walay bodyguards. Apan kon aduna silay mga tinunto, angay silang mabalaka ug mahadlok.
Sila si Albuera, Leyte Mayor Rolando Espinosa, Mayor Samsudin Dimaukom sa Saudi Ampatuan, Maguindanao ug Ozamiz City Mayor Reynaldo Parojinog gipatay sa mga awtoridad gumikan sa ilang kalambigitan sa illegal nga drugas. May rason silang gipangihaw. Busa kining uban nga nagtinarong sa ilang pangatungdanan walay angay kahadlokan. Gawas lang kon pulitika ang hinungdan. (bobbygnalzaro@gmail.com)