MAKAGUBA sa kampanya ni presidentiable Manny Villar kining iyang padayong dili pagtunga sa Senate hearing kalabot sa anomalusong C-5 Road Project didto sa Manila nga gialegar ngadto kaniya.

Imbis atubangon aron paglimpyo sa iyang pangalan ang maong imbestigasyon, naglikaylikay na hinuon siya ug ang iya na hinuong mga kaalyado maoy gipaatubang niini.

Click here for stories and updates on the Sinulog 2010 Festival.

Iyang gipasangil nga adunay bulok pulitika ang maong imbestigasyon sanglit pipila ka mga senador labi na si Senate President Juan Ponce Enrile kaatbang man nila sa partido.

Iyang gikatingala nganong karon lang kini gireklamo sa Senado nga taodtaod na man unta ning maong proyekto. Nagtuo siya nga gitayming ang maong imbestigasyon tungod kay nagkaduol na ang eleksiyon diin siya molansad pagka-presidente sa nasod.

Ang giingong anomalusong transaction, matod pa sa report sa Senado, nadiskobrehan sa dihang gi-revise ni Villar ang plano sa C-5 Road aron motadlas ngadto sa iyang yuta.

Niini, giingong gawas nga nidako ang gasto sa maong proyekto, dako usab kaayo ang na benepisyo kang Villar kay, matod pa, gibayran siya sa right of way ug ingon man motaas ang market value sa iyang yuta. Kini nakalapas sa code of ethics sa Senado ug giingon ngaadunay conflict of interest isip usa ka senador kay kuwarta sa gobiyerno ang gigamit sa pag-develop sa pribadong yuta.

Apan kini pulos lang, sa pagkakaron, alegasyon ug kinahanglan tubagon ni Villar aron mapresentar usab ang iyang habig ug sa samang malimpyohan ang iyang ngalan.

Ang paglikaylikay niya sa imbestigasyon maghatag lang unya og pagduda sa katawhan.