BAGUIO

Luzano: Nagbasol… dusaen saan a basta patayen!

Karit ken kayetket

SANGSANGKAMAYSA ti timek dagiti alkalde iti sapasap a pagilian ti nangkondena iti pammapatay kadagiti dua a kaduada iti liga dagiti Municipal Mayors ti Pilipinas. Naigamer iti dayta a rikna ti danag iti seguridad dagitoy nangruna kadagiti kuna ti PNP a karamanda kano iti Narco List.

Iti nasurok sangagasut pay a mayores ken bise a nairaman iti Narco List, ad-adu kadakuada ti nagkuwestiyon no apay ken kasano a nairamanda iti dayta a listaan.

Kayatna a sawen...awan pakainaiganda iti illegal a droga. Babaen iti LMP wenno ti League of Municipalities in the Philippines nga idadauluan ni Socorro City Oriental Mayor Maria Fe Bondial, kiniddawda: “kung may nagawang kamalian o pagkakasangkot sa iregularidad ang isang mayor ay dapat hindi ito sintensiyahan ng kamatayan, sa halip ay sampahan ng kaso sa korte.” Dayta ti takderda idi nagtataripnong dagitoy kalpasan iti pannakapapatay kada Tanauan City, Batangas Mayor Antonio Halili idi Hulyo 2 a sinaruno ti pannakaambush ni General Tinio, Nueva Ecija Mayor Ferdinand Bote idiay Brgy Imelda, Cabanatuan City idi Hulyo 3. Napudot ken sumsumgiab dagita nga eksena ngem sakbay nga intay dalapusen a sukimaten...intay man pay lagipen dagiti kontrobersiya iti kallabes:

***

Nagkalamat manen (kas iti sigud) wenno naaddaan manen iti ganna ti nagbaetan ni President Duterte ken ti simbaan-katoliko. Bimmara ti tensiyon gapu iti isyu ti “Stupid God” remarks ni Digong. Gapu iti dayta, adu a sekta ti nagburek agingga kadagiti sulinek a disso ti kagimongan. Uray sadiay pagpandayan ti linteg, gimmil-ayab ti nakuna nga eksena.

Dayta ti gapuna no apay a nangimontar ni Pres. Duterte iti grupo a makisarita iti Simbaan Katoliko tapno maes-esan ti pinnudot. Adu ti agur-uray iti angayenda a dialogo. Sapay koma, kuna ti kaadduan, ta babaen iti daytoy ket mananamton ti nasinged a relasyon (harmonious relationship) ti estado ken simbaan.

Ngem, guray, pards... dipay dimteng dayta a dialogo, adda manen baro nga uram. Dayta ti imbutaktak ti Armada ti Pagilian (AFP) nga adda pangta kano ti CPP-NDF-NPA nga agingga laengen iti bulan ti Octobre ni Pres. Duterte kas presidente. Gapu iti daytoy, naipasagid ti presidente nga adda kano taga-simbaan ti makikutkutsaba kadagiti taga-CPP-NPA.Nakiamkiam manen dayta a mensahe. Natural a nagbusingar manen ti agong ken ngangaw dagiti taga-simbaan.

Ngem itay nabiit, kinuna ti Malakanyang a “saan a sibubukel a Simbaan-Katoliko no di ketdi adda sumagmamano a miyembroda kano ti addaan pannakinaig kadagiti taga-CPP-NPA tapno madis-tugaw ni Pres. Digong kas presidente. Daytoy ti panangilawlawag ni Presidential Spokesman Harry Roque kas maysa met a ballaag iti nakuna a sekta mainaig iti posibilidad a makastrek kadakuada ti puersa dagiti komyunista.

Innayon pay ni Roque, nga iti panawen nga awan saritaan iti talna ken kapia (peace talks)... amangan ta gundawayan met daytoy dagiti komyunista ti ag-recruit ken serken dagiti nagduduma nga organisasyon. Malagip a kinumpirma ti AFP nga adda namonitorda a plano ti CPP-NPA a rebbaen ti Duterte Administration babaen kadagiti dokumento a nasamsam ti military kadagiti simmuko a rebelde itay kallabes.

No intay sublien dagiti immuna nga eksena, adda met idi basnot ni Joma Sison ti CPP a “gasgasen dagiti patutsada (kano) ni Pres. Duterte a sinaruno met ti karit ni Digong tapno agawiden ni Joma tapno sanguenna dagiti kasona. Awan masinuno nga addang ken plano no ania dagiti sumaganad nga addang panggep iti peace talk.

***

Itay nabiit, naangay ti 25th Annual National Convention of the Vice Mayors’ League of the Philippines sadiay Panglao, Bohol a tinabunuan ni Pres. Duterte. Iti bitlana, nayapidasna a “no kayat kano dagiti bise mayor a mapadaras ti panagbalinda a mayor...papatayenda laengen dagiti nakapuwesto a mayor.” Gapu iti dayta a mensahe, immapela ti Palasyo kadagiti bise mayor ti pagilian a dida koma rumbeng a seryosuen ti pammilin a papatayenda dagiti mayor. Kuna ni Presidential Spokesman Harry Roque – “Joke laeng daytoy”.

Angaw laeng kano ni Digong ti naisawangna tapno maparagsakna laeng ti tallaong iti dayta a pasken. Sabagay, am-ammon ti kaadduan ti estilo ni Digong tunggal atbitla. Kaudian a nagbalin a kontrobersiya ket ti inagkanna idi a misis ti Koreano idiay Korea idi napan immatindar iti maysa a misyon.

Ti ngamin banglesna, pards...kalpasan ti nakuna nga “angaw” ni Pres. Duterte, simmaruno met ti pannakapapatay da Mayor Halili ken Mayor Bote. Impeksa pay ni Harry Roque: “That’s really I think off-tangent ‘no. It was clearly a joke that the vice mayors appreciated. The president just like any communicator addresses his specific crowd, He was addressing the vice mayors League and he knew that they would be in enthralled with something...with a joke of this nature.”

***

Malagipko manen dagiti tapik daydi lolok panggep iti pinnatayan idi panawenda. Daan kanon nga istorya ti pammapatay. Apa iti daga, riri iti animales, alikamen, ken sigalot gapu iti as-asawa...umanayen a pagpipinnatayanda, kunana. Nalagipna pay ti kabibiag idi dagiti annak da Adan ken Eva.

Taltalloda langaruden, pinatay pay tay maysa ti kabsatna. Natawidtayon dagita nga eksena. Ngem kasla nabukelko iti tagtagainep ti dusngi ni lolok iti isyu ti pammapatay kada Mayor Halili ken Mayor Bote.

Agpada kano a takrot dagiti adda iti likud dagita a krimen. Ngamin no pudno a naturedda, apay nga aglemmengda pay laeng? Apay a dida sumango? Kas kano iti isasango idi daydi Gat. Jose Rizal idi rinapidoda idiay Bagumbayan. Saan a Katipunero daydi lolok ngem grabe ti turedna.

Naituredna ti nagbayabas iti likud dagiti pangta daydi lolak a kasla bouncer ti kabaret ti pammagina. Siguro no sibibiag pay ni lolok...agbulontaryo a mangsapul iti kunkunada nga “sniper” a nangpapatay kenni Mayor Halili. Kayatna a bagbagaan. Palsiit la koman ti inaramat ti anak ti diaske saan nga M-16. Sige, lolong...tulongannakami a kumaraba a sapay koma ta masolbaren dagita a krimen.

***

Intay sublian ti isyu ti asasinasyon kadagiti Alkalde. Dakkel ti amak ti Liga dagiti Municipalidad ti pagilian iti seguridad dagiti mayores gapu iti napagteng da Mayor Halili ken Mayor Bote.

Inggunamgunamda a sapay koma ta maresolba iti kabiitan a panawen ti nadagsen a kasasaad dagiti mayores a nairaman iti Narco List...nangruna kadagiti awanan kano met iti pakainaiganda iti illegal a droga.

Maymaysa ti linya ti panunotda: “asino kadakuada ti sumaruno a mapapatay?” Malagipko pay ti nakuna ni Bise Presidente Leni Robredo: “Buo ang paniniwala kong marami sa atin ay nakakaramdam na ng galit at pagkasuklam tuwing may bagong balita ng pagpaslang.” Dagdag pa ni madam Leni: “Huwag nating hayaang humantong sa sukdulan ng kaguluhan ang kalagayan ng ating bayan. Sa panahong na ito, ang ating nagkakaisang boses ang panlaban natin sa kultura ng karahasan at patayan. Sa ating mga salita at gawa, ipakita natin ang tunay na mukha ng Pilipino...mapagkalinga, hindi marahas, may pagpapahalaga sa buhay ng kapwa at hindi sa pagkitil nito.”

Sapay koma ta babaen kadagita a balikas ni bise presidente ket maiyurit ti baro a namnama a pagpuonan ti mas natibtibker pay a tekken ti masakbayan babaen iti legal a pamusposan. Karit daytoy nga espasyo: rumbeng a madusa dagiti nagbasol, siasinodaman a saan ketdi a mapapatay.

Adios mi amor, ciao, mabalos.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph