Meditalk: Nahadlok sa tambal sa doktor kay makadaut sa kidney (2)

(Pasiuna: Kini ang atong pagpadayon sa atong pagtuki sa suliran nga gipadangat kanato ni Martha of Bangkal mahitungod sa iyang mga kabalaka sa mga nadunggan batok sa mga tambal sa mga doctor.)

DEAR Martha of Bangkal,

Ug karon sa atong pagpadayon sa atong pagtuki sa imong gipadangat nga pangutana.

Kining complementary medicine sa teoriya, mahimo kini sa tanan. Wala gibali kung naay sakit o wala. Ang tanan nga tawo mamahimo nga managlahi ang pagresponde sa kada produkto o praktis. Importante usab nga mahibaw-an nga ang uban nga mga komplementaryo nga pagtambal mas gi-istudyohan kaysa uban.

Pananglitan, ang pagtuon nagpakita nga ang acupuncture mamahimo nga makatabang sa pagbatok sa sakit nga gibati sa dugay na nga panahon, lakip na ang sakit sa ubos nga likod ug liog. Napruwebahan usab kini nga epektibo sa pagtambal sa sakit nga gihatud sa rayuma ug nagkalain laing klase sa sakit sa ulo.

Ang yoga makatabang usab sa mga pagpanakit sa lawas. Makapakubos usab kini sa depresyon ug mga kahingawa, lakip na ang presyon sa dugo ug pagpaspas sa dagan sa kasing-kasing.

Ang uban nga mga komplementaryo nga mga pagtambal susama sa acupuncture makatabang sa kakapoy sa lawas, pagkasukaon, ug lain pa nga mga side effects sa pagtambal sa kanser.

Aduna bay mga risgo? Naa kaayo. Kini ang kaso sa tanang klase sa medisina, ma alternatibo, komplementaryo o tradisyonal man. Mao nga kini imong ginaingon nga daghan ka og nadunggan nga makadaut kining mga tambal sa doctor sa medisina sa kidney, ania ang kamatuoran. Ang tanang tambal ana a gayuy side effect. Apan, wala nagpasabot nga kung adunay risgo, dili na lang ihatag. Pananglitan, kining tambal sa high blood, mamahimo nga maka-aslom sa tiyan. Maskin pa man sa pagpangaslom sa tiyan nga ihatud niini, ihatag gihapon ni namo tungod kay mas makuyaw kung dili mahatag. Gawas pa nga dili man sad tanan maapektuhan gayud ang ilang tiyan sa maong tambal.

Asa man ka mahadlok sa pagpangaslom sa imong tiyan? O sa stroke unya, kay wala ka nag-atiman sa imong presyon sa dugo?

Apan, usa kita magpadayon sa unahan, tungod kay taas-taas pa man gihapon ang atong pagahisgutan mahitungod niining imong isyu nga gipadangat kanato, tugoti na usab ako nga ato kini nga padayunon pagtuki sa mga sunod nga edisyon niining atong patik. Hangtud na usab sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor saiyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)