SAMTANG nagkaduol na ang bulan sa Oktubre nga maoy pag-file sa certificate of candidacy, tanang magpapili sa bisan unsang politikal nga posisyon lokal man o nasyunal, hisgutan ta ang dagan sa politika niining duha ka probinsiya nga nagka-init ang dagan sa ilang politikanhong kalihokan, kini mao ang probinsiya sa Davao del Norte ug Davao del Sur.
Unahon ta ang Davao del Norte nga unta kauban sila sa administrasyong Duterte, apan gumikan sa mga personal nga panagbangi nahimong kaaway na karon sa umaabot nga bugnong lugaynon.
Kini ang ang kampo sa Del Rosario ug Floirendo, ug Speaker karon sa 17th Congress, Pantaleon Alvarez. Tungod kay wala na gyu'y maayong matertrial si Speaker Alvarez nga maoy isakbang sa naglingkod karon nga gobernador, Anthony Del Rosario, nagmantinil nalang intawon paghulbot sa iyang chief of staff aron maoy mokandidato sa pagka-gobernador sa probinsiya.
Hinuon tagsa-tagsa kanato pulos adunay katungod sa pagsalga ug pagpanimpalad sa natad sa politika, pero, kon magsugod ta sa pagtungha, kinahanglan gikan ta sa primarya hangtud sa elementarya, dili ka gayud moderetso sa sekondarya o sa kolehiyo.
Kon atong itandi sa sports sa natad sa boxing, dili pwede nga ang walay kabangkaagan sa sinuntokay ibawbaw sa royeda, imong isakbang sa champion ug may titulo na sa iyang propesyon, kay sigurado gayud na nga ma knock out, ug labaw sa tanan dili na usab uso karon ang David and Goliath tungod kay politika kining awaya.
Pero wa’y magbuot sa ila kay mao sad na’y ilang pagtuo, gisabot pud sa ilang kaatbang nga wana gyu'y maayong politiko nga ilang makuha tungod kay bag-o pa man pud sa politika ang ilang amo, nga gustong maghari-hari-an sa politika sa Davao del Norte.
Davao del Sur
Adtuon nato ang Davao del Sur nga dunay susamang kasaysayan sa pamolitika kining duha ka probinsiya nga pulos walay maayong material ang oposisyon nga ilang isakbang sa naglingkod karon nga gobernador sa maong probinsiya.
Ang oposisyon pinangunahan ni Mayor Josep Penas, pwerteng pagpaningkamot nga mabutangan na’g ikaduhang distrito ang probinsiya, kay gusto nilang likayan nga ma-engkwentro ang mga Cagas sa posisyon nga ilang gikuptan karon, pero kay dili naman gayud maapas, ila na usab nga gipangulitawhan si retired PNP Director General Ronald “Bato” Dela Rosa nga lagi, mokandidato sa pagka-gobernador atbang kang Governor Dodo Cagas.
Amigo nato si Ronald “Bato” Dela Rosa, pero dili politiko, ug labaw sa tanan wala pa gayud siya’y nahimo sa Davao del Sur, kay diman lagi politiko? Porke ilado ang pangalan modaug na siya sa pagka gobernador, kana lagi, kon iyang dawaton? Kong magsalig siya nga i-endorso sa atong presidente, diha siya nasayop, kay dili tanang gi-endorso sa presidente gisunod sa mga katawhan.
Nahitabo na na diri sa dakbayan sa Davao sa mortal niyang kaaway sa poilitika nga gusto niyang mahanaw na sa natad sa politika apan wa gayud mosugot ang mga tawo. Sa milabay nga nasyunal eleksiyon, ang kampanya sa atong presidente, “kon dili ninyo iboto ang akong bise presidente, Allan Peter Cayetano, ayaw na lang pud ko ninyo iboto” resulta, pildi.
Kong mosalga ka’g politika imong ka-ugalingon maoy saligi, dili ang mga dagkong politiko kay dili sila maoy mosilbi sa mga katawhan kon dili ikaw, pangutan-a usa ang imong kaugalingon kon angayan kaba O dili, bag-o ka modisisyon.