HNP nipalig-on sa DavSur, DavOcc

DAVAO OCCIDENTAL -- Gibutyag sa amahan ning lalawigan nga mas palig-unon pa nila ang ilang linyada ilawom sa partidong Hugpong ng Pagbabago (HNP) karong hingpit ng gidawat sa Commission on Election (COMELEC) ang rehistrasyon niini.

Sumala ni Governor Claude Bautista, usa sa founding members sa HNP, nga gilantaw nilang mas daghan pang mga politiko ang motapon sa ilang partido human nga giila na kini sa Comelec isip partido alang sa 2019 midterm elections.

Sa Davao del Sur, mayorya na sa mga mayores ug bise-mayores ang nagpailawom sa HNP lakip ang mga kanhi mayor sa matag kalungsuran.

Nakita sa mga opisyal nga usa ka lig-ong partido ang HNP nga gitukod ni Davao City Sara Duterte-Carpion.

Nagpailawom na sa HNP ang pipila ka mayor sa lalawigan sama ni Sta. Cruz Mayor Alexis Almendras, Hagonoy Mayor Conrado Laza, Kiblawan Mayor Jason Rama, Padada Mayor Pedro Caminero ug Digos City Mayor Joseph Peñas.

Si Almendras nagbutyag nga makig-alayon na kanila si kanhi mayor Joel Ray Lopez apan wa gibutyag kun kini ang modagan nga bise-mayor sa Sta. Cruz.

Gihuwat sab nila nga motapon na sa HNP si Magsaysay Mayor Arthur Davin ug ang ubang mayor sa lalawigan.

Lakip nga nagpailawom sa partido ang kanhi mayor sa Malalag nga si Roel Paras, Bise-mayor Edwin Reyes nga kanhi mayor sa lungsod sa Bansalan ug Bise-mayor Jose Jimmy Sagarino sa lungsod sa Sulop, Davao del Sur.

Sa kasamtangan, tulo na lang ka mga mayor ang wa nagpakita og interes sa HNP nga mao sila si Bansalan Mayor Quirina Sarte, Matanao Mayor Vincent Fernandez ug Malalag Mayor Peter Paul Valentin.

Si Vice-governor Aileen Almendras, kinsa mao ang provincial chair sa HNP, nagbutyag nga gitakda silang mohimo og tigom aron hingpit nga maplastar ang linyada sa HNP alang sa taliabot nga piliay.

Una nang gibutyag sa maong grupo nga si retired PNP Chief Ronald “Bato” dela Rosa, nga kasamtangang Bureau of Corrections director, mao ang ilang padaganon nga gobernador.

Gihuwat na lamang sa grupo ang pinal nga desisyon ni dela Rosa human nga nagkakusog sab ang panawagan nga modagan kining senador kuyog ni Special Assistant to the President Christopher Lawrendce “Bong” Go.

Gilantaw sab sa HNP nga mas daghan pang mga konsehal sa matag kalungsuran ang motapon kanila human nagsugod na ang nationwide recruitment sa partido.

Si Mayor Peñas nga unang mideklara nga modagan pagka-gobernador, nagbutyag nga andam siyang mosunod kun unsa ang imando sa partido human nga si dela Rosa ang gilantaw nga mangulo sa grupo.

Andam si Peñas nga modagan nga kongresista ugaling mahimo nga pinal na si dela Rosa pagka-gobernador.

Daghan na sa mga molupyo sa lalawigan ang naghinam-hinam nga masayod kun kinsa ang moatbang sa mga Cagas apan sumala sa HNP nga aduna pay “second round of talks” tali ni Peñas ug dela Rosa aron iplastar ang mga posisyon nga ilang daganan. (OBD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph