NIMANDO ang pangulo sa Police Regional Office (PRO-7) Chief Supt. Lani-o Nerez kang si SPO1 Adonis Dumpit sa pag-surrender na sa kapulisan.
Kini human nga hangtod karon si Dumpit wa pa gayod motahan bisan pa sa nigawas nga warrant of arrest alang kaniya sa kasong murder tungod sa pagpusil patay sa menor de edad nga si Ronron Go.
Nireklamo na ang banay ni Go nga way gihimo ang kapulisan sa pagdakop kang Dumpit.
Si Nerez niingon nga di tinuod nga wa silay gihimo aron pagdakop kang Dumpit.
Gani ilang gihimo ang tanan aron mapatuman ang balaod.
Apan hangtod karon wa na mokontak pa kanila si Dumpit bisan pa ilang pagsigeg tawag niini.
Matod niya nga di lang ang pangulo sa Cebu City Police Office, Cebu Provincial Police Office ug ang iyang unit nga Regional Security Agencies and Guard Supervisory
Unit gimandoan sa pagdakop kang Dumpit kon makit-an.
Lakip sa ipasusi ni Nerez ang report nga si Dumpit naa ra dinhi sa dakbayan sa Sugbo ug kuyog ra kanunay ni Mayor Tomas Osmeña sa iyang mga pulong-pulong.
Hinuon gihimakak na kini sa pangulo sa CCPO nga si Senior Supt. Patrocinio Comendador.
Bisan si Osmeña niingon nga dugay na siyang wa makakita kang Dumpit hinungdan nga nabalaka siya sa mahitabo niini.
Giawhag ni Comendador kadtong mga tawo nga nakakita kang Dumpit sa pag-report kanila aron ilang madakop.
Si Nerez niawhag kang Dumpit sa pagtahan na sa iyang kaugalingon aron ila usab nga matabangan ilabi na sa iyang siguridad ug di siya matipon sa mga criminal nga nabilanggo kon ibalhog na siya sa city jail. (DRT)