ARON kalikayan ang posibleng pagkauswag karon nga natakda na ang plebisito alang sa pagbuak sa Barangay Guadalupe,si Cebu City Rep. Antonio Cuenco (Cebu City, south district) niawhag sa Office of the President nga gahinan kinig pundo..
Iyang giawhag ang presidente sa pagpasiuna sa pundo, nga P1.458 milyunes sa kinatibuk-an, tungod sa kadinalian sa pagpahigayon sa plebisito unya sa Pebrero 28.
Sa iyang suwat nga pinetsahan niadtong Enero 21, si Cuenco niingon nga ang Commission on Elections (Comelec)naghuwat sa pagpagawas sa budget nga ubos sa General Appropriations Act.
“In view of the urgency of the conduct of such plebiscite, we would like to request that the funding requirement thereof be advanced by the Office of the President subject to eimbursement from the Comelec once their budget the year is released,” siya nagkanayon.
Matod ni Cuenco nga si Executive Secretary Eduardo Ermita nisaad kaniya sa pag-release sa kuwarta, nga iyang I-follow-up karong semanaha.
“Mao nay akong adtuon sa Malacañang. Mao nay akong tutokan ron,” matod niya sa Sun.Star Cebu sa pagtapos sa semana.
Sa laing interview kagahapon, si Vice Mayor Michael Rama niingon nga kinahanglan nga ang plebisito ipadayon ug di iuswag.
Dihang gipangutana kon andam ba ang Siyudad sa pagpahuwam sa mao nga pundo, siya niingon nga segurado siyang si Cuenco mangita gyud og paagi. (RHM sa Sun. Star Cebu)