LOLA gidunggab patay niadtong Dominggo sa nagbinugtong nga tulisan atubangan sa iyang tindahan.
Nakakita ang iyang 12-anyos nga apo sa krimen dihang gidunggab si Anita Bontilao Auman, 65, kinsa giingong bag-o lang usab nga nahalinan og kamote.
Ang pagpanulis ug pagpanunggab nahitabo pasado alas syete sa milabayng gabii sa Porok 4, Barangay Cambinocot, bukiran nga barangay sa siyudad sa Sugbo.
Si Auman namatay pag-abot sa North General Hospital.
Sa pasiuna nga imbestigasyon nila ni PO3 Geofrey Gutual, PO2 Leroy Baguio, PO2 Lou Pagara ug PO1 Geronimo Cristobal sa Homicide Section nagbutyag nga nagbantay ang biktima sa iyang tindahan.
Ang iyang apo nga 12 anyos maoy bugtong niyang kauban, kinsa nagluto og kamote gawas sa tindahan.
Mao na lay nakit-an sa bata nga niduol sa iyang apohan ang usa ka tawo nga nagsul-ob og jacket ug nagtaptap sa iyang nawong gamit ang t-shirt.
Kalit lang nihulbot og mahait nga hinagiban ang mamumuno dayong dunggab makaduha sa biktima tumong sa dughan ug kilid.
Diha-diha natumba ang biktia sa yuta.
Human matumba ang biktima, gikuha sa mamumuno ang usa ka wa na gamita nga urenola nga gisudlan sa mga halin sa tindahan.
Dali kining nidagan paingon sa umahan nga ngitngit kaayo.
Dako ang pagtuo sa kapulisan nga suhito sa dapit ang killer ug taga diha ra sab kini hinungdan nga nagtaptap pagduol sa biktima.