GIPANAWAGAN karon ang tanang atletang lumad nga Misamisnons ug Kagayanons nga mosalmot sa 18 kilometers Team Marathon nga himuon sa Septiyembre 11, 2018 sa Cabadbaran City.
Sa interbyu sa SunStar SuperBalita kang Joenel Pogoy kinsa organizer sa Laban ng Lahi events iyang gibutyag nga pinasahi kini nga kalihokan tungod kay dili individual ang pagdagan kon dili usa ka team.
"Sa Misamis Oriental ug Cagayan de Oro wala pay nagparehistro pero naa na gikan sa Socksargen, Baguio ug laing region," matud ni Pogoy niadtong paghidangat niini sa siyudad sa Cagayan de Oro aron moaghat sa mga atleta sa pagsalmot.
Dugang niini nga talagsaon unta kaayo ni nga kahigayonan nga makasalmot ang taga probinsya sa Misamis Oriental ug siyudad sa Cagayan de Oro hilabina nga kini nga mga lugar nag produce og mga banggiitang atleta sa natad sa isports.
Gipasabot niini mao ang bag-ohay lang pagbitbit sa probinsya og gold medal sa Palarong Pambansa pinaagi ni Erwin Mancao, lumad nga taga Villanueva, Misamis Oriental kinsa nakasakmit og gold medal tungod sa kakusog niini modagan sa 5,000 meters run.
Gawas ni Mancao nagprodyus sab ang siyudad sa Cagayan de Oro og silver medalist pinaagi ni Lexter Cupin, kinsa nakakuha og distansya nga 33.70 metro diin iyang gipilde iyang kaugalingon nga record.
"Panahon na para magkahiusa ang team Cagayan ug team MisOr ug mobou og team nga mosalmot sa 18k Team Marathon nga gikinahanglan og 33 ka miyembro," matud ni Pogoy.
Dili usab basta basta ang premyo tungod kay moabot sa P3 milyon ang 1st prize ug laing P1 milyon alang sa mapiling komunidad nga tabangan ug laing P350K alang sa mapiling charity.
Tungod sab kay 1st come first serve basis ang registration, kadtong pasok sa Magic 30 adunay libreng akomodasyon sa biyahe og pagkaon.
Dungan sab sa Marathon ang grand draw sa Love of the country Raffle Promo diin bag-ong sakyanan ang ipanghatag. Ang ticket mapalit sa kantidad nga P100.
Dugang ni Pogoy nga lakip sa kalihokan ang libreng paniudto diin giandam ang 100 ka mga litson baboy ug 100 sab ka litson turkey.
Gipasabot ni Pogoy nga ang Laban ng Lahi usa ka Sports League nga suportado ni Senator Manny Pacquiao ug uban nga mga ahensya diin tinguha niini mao ang pagkahiusa sa tanang katawhang Pilipino ug mapasigarbo ilang tagsa tagsa ka mga talento.