DAKO ang pagkunhod sa crime volume sa Northern Mindanao. Tiaw mo 40 porsiento o 4,986 nga pag-ubos sa kriminalidad sa unang tulo ka bulan ning tuiga kon itandi sa miaging tuig.
Apan, dili pa angay magselebrar atong kapolisan kay bisan niining pag-ubos sa kremin wala kana magpasabot nga naluya ang mga daotang elemento sa komunidad.
Mas modako pa gyud tingali ang pagkunhod sa kriminalidad kon mismo ang katawhan moabag sa kampaniya sa kapolisan. Dili sa ingon nga komkomon nila ang balaod sa ilang kamot.
Ang labing epektibo sa pagtabang simpol ra gyud. Timan-i walay snatcher kon walay magpadisplay sa ilang mga alahas. Walay mangunguot kon magmatngon usab ta kanunay sa atong kabtangan.
Ang problema gud mao nga mosiaw ning mga kawatan kay daghan man sab gud sa mga tawo nga nag-agni sa pagbuhat og kremin. Kon dili ta magpasayasaya og pakita sa atong mga mahalon nga butang, kinsa may snatcher o kawatan nga moduol nimo.
Unya ra ba kon mabiktima mag-alburoto sa kalagot ug kasuko. Pero kinsa may angay basolon. Dili ba kaha ikaw mismo kay nagpasigarbo ka sa imong mahalon nga butang.
Wala man ta did-i sa pagbaton og mga mahalon nga alahas, cellphone o relo apan dunay mga paagi nga angay nato sab tamdan aron malikay ta sa mga daotang tawo sa palibot.
Sakto gyud ang Ginoo. Miingon siya: “Himoa nga ang pagpaanyag ninyo sa inyong kaugalingon dili anha sa inyong dayag nga panagway pinaai sa pagsalapid sa buhok, sa pagdayandayan ug mga alahas nga bulawan ug sa pagsul-ob og mga hamiling bisti.
Kondili anha hinoon sa pagkatawo nga natago sulod sa kasingkasing pinaagi sa dili madunot nga alahas sa maaghop ug malinawon nga espiritu, alahas nga bililhon uyamot sa atubangan sa Dion.” I Peter 3:4,5.
Kon mosuroy ka nga way dalang mahalon nga butang dili gyud ka mabalaka. Apan, kon nagsul-ob kag branded nga relo, cellphone, bulawan nga kwentas, aryos, pulseras [kana bitawng mura na og Christmas tree imong lawas kay napuno og dekorasiyon] ug mahalon nga sapatos, kalo, t-shirt – pastilan kon maatlan ka sa ngilit nga dapit, segurado mahuboan ka gyud.
Busa dako baya og papel ang lungsoranon sa pagpakunhod sa kreminalidad.
Ang konsuwelyo lang niining pagkunhod sa kremin sa atong probinsya mao nga makita nato ang paningkamot sa kapolisan.
Kon sangkapan nato ang kapolisan sa ilang tanang panginahanglan paggukod sa mga kriminal, nan, segurado mas epektibo pa gyud ilang mga kampaniya batok sa kremin.
Kining police visibility bitaw, dako baya og ikatabang. Magpanuko man ang kriminal pagbuhat og daotan kon duna kanunay ning polis makita sa atong palibot.
Apan, bisan pa kon naa lagi ning polis kon kuwang og kagamitan – walay radyo, walay sakyanan, samot na kon walay pusil – unsaon man lugar niya pag-ataki sa kriminal.
Karate nalang o karatil og dagan.