BISAN nakasakmit ang Golden State Warriors og back-to-back titles sa National Basketball Association (NBA), grabe lang gihapon ang kahidlaw niini sa korona.
Mao kini ang gipadayag sa usa sa labing mga pambato sa Warriors nga si Kevin Durant sa iyang pagbisita sa Manila sa miaging adlaw.
“We want more. We want to get a three-peat. We want to keep at it,” matod ni Durant sa interbyu sa www.abs-cbnnews.com.
Ang NBA Finals MVP mibalik sa nasod aron i-promote ang bag-o niyang signature shoes sa Nike sa Araneta Coliseum.
Giklaro ni Durant nga bisan sa kalig-on sa ilang puwersa, dili sayon ang pagsulod og balik sa finals ug labaw sa tanan, ang paglangkat niini.
Gani gipasabot ni Durant nga sa miaging season, wala gyud sila maghisgot kabahin sa finals hangtod nga nakapatong na sab sila pagbalik niini.
“We never talked about the championship, or holding up the trophy until we’re actually playing for it, which is in the finals,” dugang ni Durant.
Imbes nga maghunahuna sa korona, matod ni Durant nga mas nagtutok sila sa ilang matag adlaw nga ensayo sa regular season.
Matod ni Durant nga kinahanglan nilang ipabilin kining maong pamaagi alang sa ilang gitinguha nga three-peat.
Nagkanayon si Durant nga nasayod sila nga ang laing 29 ka teams sa liga pulos nangandoy nga lumpagon ang ilang gingharian hinungdan nga mas kinahanglan nilang mangandam og maayo.
Gikan sa Cleveland Cavaliers, ang four-time MVP nga si LeBron James mitabok sa Western Conference ug nagpasakop sa Los Angeles Lakers sa tinguha nga makagiya og batan-on nga puwersa. (ESL)