ROTA sa Ironman 70.3 Asia Pacific Championship sayon alang sa mga traffic enforcer sa dakbayan sa Mandaue itandi sa mga miaging tuig sa pagpahigayon sa lumba.
Gipasabot ni Glen Antigua, hepe sa Traffic Enforcement Agency of Mandaue (TEAM), nga di ra sila maglisod sa pagdumala sa dagan sa trapiko atol na unya sa pagpahigayon sa Ironman kay di komplikado ang mga karsada nga agian.
“Last year man gud kay mi-agi sa 2nd bridge mao tong affected ang U.N. Avenue,” matod ni Antigua atol sa press conference kagahapon.
Ang rota sa bike course maggikan sa Mactan Circumferential road, dakbayan sa Lapu-Lapu lahos sa unang Mactan-Mandaue Bridge subay sa A.C. Cortes Avenue, left turn sa D.M. Cortes, right turn sa A. Soriano Street paingon na ngadto sa Zuellig Avenue.
Ang nahisgutang karsada sirhan gikan sa 4:00 sa buntag ngadto na sa alas 12:30 sa hapon sa Agusto 5.
Bugtong nakalahi sa karong tuiga nga Ironman kay sud sa tulo ka higayon nga magbalik-balik ang mga atleta aron sa pagkompleto sa 90 kilometros nga bike course.
“Sa una kay magpaabot mi sa communication from Talisay ug Cebu City kon duna pay bikers (nagpadung),” saysay ni Antigua sa di pa nila buksan pagbalik sa publiko o motorista ang karsada.
Matod sa opisyal nga sama ra sa normal nga adlaw ang mao unyang kalihokan sanglit di ra makamugna og kahuot sa dagan sa trapiko kay way mga dagkong establisemento nga maapektuhan ilabi na sa Zuellig Avenue ug naatol sab sa adlawng Dominggo.
Gipahibawo sab nga gibuksan na ang Ouano road sa may North Reclamaion Area sa Mandaue sa dihang adunay gihimong road repair ang WT Construction sa dapit. (FVQ)