TALIABOT na ang ikatulo nga State of the Nation Address (Sona) sa pangulo. Way nasayud kung unsay iyang itaho sa madlang pipol kay daghan kaayong isyu nga nitumaw sukad siya nilingkod sa puwesto niadtong 2016.
Naay nagsulti nga dili mobasa og kodigo ang pangulo, hinunua himuon niyang "extemporaneous" o diretso-diretso ang iyang diskurso atubangan sa minilyon nga Pinoy nga molantaw sa Sona.
Di ikalimod nga daghan siyang nahuman, ilabi na sa iyang saad sa eleksiyon sa pagsumpo sa ilegal nga druga, kurapsiyon ug kriminalidad. Apan daghan pa siyang angayang buhaton nga gipaabot sa katawhan. Busa daghang grupo nga nagpakita sa ilang "discerned cooperation" sa administrasyon ni Presidente Rody Duterte.
Usa niini mao ang Kamalayang Pinoy Movement-Katipunan Party (KP) nga nahimugso didto sa kaulohan niadtong Mayo 3, 2003 nga usa ka pangkatawhang inisyatiba aron mapakgang ang "trapo-culture of elitist patronage, personality-oriented and syndicated organized crime-supported politics" sa nasud.
Atong mahimumdoman nga mao usab kini ang nagtunhay nga sistema sa nasud nga buot lumpagon ni PRody sa iyang pagdagan isip pangulo nga gisuportahan sa sobra 16 milyon nga botante.
Sukad sa pagtukod, gipalaganap sa grupo ang mga edukasyon ug pagbansay kabahin sa sistema ug lideratong pang-kausaban.
Ang maong kampanya nakapahimugso sa Bagong Sistema, Bagong Pag-asa (BSBP) ug ang Katipunan ng Kamalayang Kayumanggi (KKK)-Political Party (KP).
Human sa eleksiyon sa 2016, giduso sa BSBP-KKK ang ilang 3-point agenda sa pangulo nga mo-swak sab sa iyang gustong mahitabo sama sa: 1) pagputol sa trapo-politics ug ang mapahimuslanong papel sa adunahan; 2) pagpalig-on sa "center for national survival, interest and development", lakip niini ang pagpagahum sa pangulo aron mas epektibo kining modumala sa nasud; ug, 3) kausaban sa batakang balaod.
Gawas sa mga pagtuon ug pagbansay sa bag-ong liderato, gisuportahan sa BSBP-KKK ang kausaban sa konstitusyon nga gihimo sa usa ka komisyon nga gipangulohan ni kanhi Chief Justice Reynato S. Puno Jr.
Dili pa dugay, gisumite na sa grupo ni Puno ngadto sa pangulo ang kausaban sa batakang balaod nga ilang gipanday sulod sa upat ka bulan ug gusto nilang lagdaan sa pangulo aron mahimong "priority bill" sa Kongreso.
Apil sa kabag-ohan nga ilang gisugyot mao ang konsepto sa pederalismo ug katukuran sa 12-14 ka Federal Regions subay sa kasamtangang regional subdivisions sa atong nasud.
Busa karong adlawa, Hulyo 10, ipahigayon dinhi sa Davao City ang 2nd Joint National Convention and General Assembly sa Kamalayan Pinoy Movement-KP.
Mokabat og 200 ka delegado gikan sa nagkalain-laing lugar sa Pilipinas ang motambong sa maong asembliya. Tukion sa mga delegado karong adlawa ang kaugalingong "State of the Nation" ug ang "Plan of Action" nga buhaton sa grupo isip suporta sa administrasyon ni PRody aron mapatuman kining three-point agenda nga ilang giduso niadtong 2016.
Si Mayor Sara Duterte-Carpio ang dinapit nga "Keynote Speaker" sa maong kalihukan nga ikahimuot sa mga delegado ilabi na nga taliabot na ang eleksiyon sa 2019 ug nasayud kita nga gusto sab kaayo ni Mayor Sara ang kausaban ug bag-ong hitsura sa politika sa nasud.
Welcome sa Davao ug good luck sa tanan!