DI na maglisod karon ang mga boring sa siyudad. Kay aduna nay nindot nga sideline nga dako ang income nga mao ang pagbaligyag shabu sa ilang mga customer. Nabalita ning mantalaan di pa dugay.
Gawas diay sa ilang lawas mobaligya pa sila og shabu. Kusog ang halin ning paagia kay hayluon man ang baligyaan og pipila ka hurada nga pakapin. Kinsay di mosugot nga customer sa ingon niini nga haylo.
Ang customer nga di tiggamitan og druga mapugos sa pagpalit tungod sa haylo. Mahimong pugson sa paggamit aron maanad ug iya na nga captive user.
Ang tiggamitan mahimong mogamit una silag shabu pag-inat sa ilang resistensiya sa arangkada sa sex. Kay matod sa nakasuwayg shabu mosaka sa hilabihan ang libido sa sex.
Alang ning lindog kining pagdakop sa boring maoy tumoy sa iceberg lamang. Kay may dakong posibilidad nga mas halapad na ang drug pushing diha sa commercial sex industry.
Wa ta masayod nga dakong buhi ang illegal trade diha sa mga disco bar, beer joint, restro bar, dancing pub ug ubang area nga nagmanukan ang mga boring sama sa Mango, kamagayan, Colon-Colonade ug Escario.
Ang mga GRO nga manghod na lag gamay sa prosti may purohan nga nag-drug pusher sad. Ang mga prosti nga anaa sa mga boarding houses, massage parlors ug bawdy inns wa kaha mag-sadlayn niining shabu?
Bukahon og dako unta ang mga mata sa mga mananakop niining bahina. Wa kahay mga pulis pud nga mga protector ning mga balay sa kahilayan nga akong gihisgutan dinhi?
Kon aduna, monay pagaingnon nga kalisod palandungon. Kahimtang nga di na matabang ug mabangbang. Mosamot nga magsaguroy ang tinguha pagpuo sa illegal drug trade.
Duha na ka tuig kining anti-drug war sa kagamhanan. Apan nakita nga lisod mapanton ang bisyo sa drugas. Kay ang ning-surrender klaro man kaayo nga namalik sa maong bisyo.
Kahibudngan kaayo. Wa sila malisang nga mamatay. Wa sila matarog sa kamatay sa linibo nga nahiagom sa buy-bust operation. Bisag gamay na lang wa sila mahulga.