KARONG adlaw nga Dominggo, Hulyo 15, maoy katapusan nako nga adlaw isip regular nga empleyado sa SunStar Davao Publishing, Inc.
Kini tungod kay nag-resayn na ako sa pinangga nako nga mantalaan nga SunStar Superbalita Davao. Apan, tugoti ako nga akong isaysay dinhi akong kasinatian.
Sa pagkatinuod, ning mantalaan ako nagsugod isip reporter niadtong Agosto 1999 hangtud Marso 2001.
Nibiya ako tungod kay buot ako makatrabaho sa gobyerno uban ni anhing Konsehal Leo Avila III.
Sa naghinapos na ang termino sa buotan ug kugihan nga konsehal, gitanyagan na usab ako ni anhing Superbalita Managing Editor Ely Luciano nga mobalik niadtong Disyembre 8, 2008.
Tungod sa maong tanyag, mi-resayn ako isip co-terminous employee ug miuyon nga mahimong consultant sa opisina hangtud 2010.
Ning mantalaan ako nahatagan og oportunidad nga mahimong managing
editor hangtud editor-in-chief mao nga nahimamat nako ang mga buotan nga tag-iya sa kompanya.
Gawas sa akong obligasyon sa editorial department, nahatagan ako og higayon nga makat-on sa buluhaton sa production, circulation, marketing, human resource, ug uban pa.
Samtang gihimo nako ang mga buluhaton sa kompanya, gitapos nako akong masteral ug doctoral sa public administration.
Tuod man, samtang gihimo nako ang dissertation, miabot ang oportunidad
nga magtudlo sa Professional Schools sa University of Mindanao diin nahimo nakong estudyante ang tag-as nga opisyal sa lokal ug nasyunal nga ahensya sa gobyerno.
Niadtong Mayo ning tuiga, nahimo akong faculty member sa Political Science Program sa maong unibersidad.
Nagtuo ako nga kini pagbuot sa atong Labaw nga Makagagahum, busa, ako kining atimanon nga tahas aron magiyahan ang mga kabataan nga mahimong lider sa atong nasud.
Sa pagkakaron, malipayon akong naghimo sa tahas isip professor, broadcaster, columnist, ug consultant sa samang higayon.
Alang sa mga tag-iya sa kompanya, SunStar President Gina Atienza, General Manager Tessie Paña, SunStar Davao Editor-in-Chief Stella Estremera, HR/Admin Supervisor Donna Cuyos, Production Supervisor Raymundo Dumagonot, Circulation Supervisor Leo Ocot, Accounting Supervisor Lovella Panio, Credit and Collection Supervisor Margie Abordo, Desk Editor Wenz Mendoza, Senior Reporter Rhona Villariasa, Marizz Perez, Jeepy Compio, tanang empleyado, ug mga suki sa Super B, daghang salamat kaninyong tanan.
Ang usa ka milyon nga pasalamat di paigo sa inyong kaayo nako sud sa 303,004,800 segundos nga pag-alagad sa kompanya.