DUHA ka mga lalaki ang pulos nilanding sa balay tambalanan human nakuryenti.
Unang gidala sa Northern Mindanao Medical Center ning siyudad sa Cagayan de Oro mao si Rogelio Aljas, 37, ulitawo.
Nahitabo ang insidente niadtong Domingo, mga alas 9:30 sa gabii sa lungsod sa San Fernando, Bukidnon.
Nasayran nga aksidente ang hitabo tungod kay igo lamang si Aljas nga nagtaod og antenna sa telebisyon sa ilang panimalay dihang nahawiran niini ang napanit nga wire hinungdan nga nipirig ang biktima.
Sunog ang duha ka mga kamot ni Aljas, duha ka tiil ug apektado ang ulo niini. Samtang padayon pang giatiman sa mga doktor ning panahona.
Samtang laing biktima ang nasunog usab ang kamot nga mao si Bengie Mulawan, 23, ulitawo, taga Iponan ning siyudad human nakuryenti kagahapon mga alas 7:00 sa buntag.
Si Jose, amahan sa biktima nga nahinabi sa Sun.Star Superbalita nibutyag nga paingon na nga mamalantsa ang iyang anak apan wala niini mabantayan nga napanit ang wire sa extension wire nga gamiton niini. Nahawiran sa biktima ang maong wire hinungdan sa pagkirig niini.
Maayo na lamang dali nga napalong ang kuryenti ug nabira ang biktima hinungdan nga tuo nga bahin sa kamot lamang niini ang sobrang naapektuhan.
Gidala ang biktima sa susamang tambalanan ug padayon pang giatiman sa mga doktor ning panahona.