PULOS nilanding sa balay tambalanan ang duha ka mga lalaki human nahitabo ang rambol kagahapon mga alas 1:17 sa kadlawon sa Agora road ning siyudad sa Cagayan de Oro.
Giila ang biktima nga mao sila si Jhonny Bahay, 24, ug Bernabe Dagonio, 26, ulitawo, pulos mulopyo sa Barangay Mat-i, lungsod sa Claveria, Misamis Oriental.
Nasayran nga nag-inom ang duha ka higala sa usa ka videoke bar sa maong dapit dihang sa ilang paggawas sa maong videokihan giatangan sa grupo sa mga lalaki ug deretso nga gitabangan og sukmag. Nisukol ang duha ka mga biktima hinungdan sa nahitabong rambol.
Si Bahay wala masayod nga ang iyang naengkwentro adunay dalang ice pick hinungdan nga deretso nga giluba ang biktima sa iyang likod nga bahin.
Samtang si Dagonio maayong pagkagisi sa tuo nga bahin sa kilay ug bun-og sa lawas ang naangkon niini. Human sa hitabo, nagsig-iya sa pagpangdagan ang mga suspetsado ug gibyaan nga nagbuy-od ang mga biktima sa dalan.
Duha ka mga lalaki ang nidala sa mga biktima sa Northern Mindanao Medical Center ug maoy nipahibalo sa kapolisan sa Police Station 3 sa Agora.
Giresponde pa sa mga polis ang maong hitabo apan walay nakitang suspetsado sa lugar. Niini, padayon pang giimbesitigahan ang hitabo.
Samtang nagpabilin pa sa balay tambalanan ang mga biktima ug padayon nga giobserbahan sa mga doktor. (Stephanie V. Berganio)