GITULIS ug giluba ang 15 anyos nga dalagita ug gisuwayan og lugos niadtong Domingo mga alas 7:30 sa gabii sa Jr. Borja Extension ning siyudad sa Cagayan de Oro.
Giila ang biktima nga si Claide (Bansagon gipugngan), taga Upper Kolambog, Lapasan ning siyudad sa Cagayan de Oro.
Si Police Inspector Wilyn Rojo, hepe sa Police Station 3 (PS3) sa Agora nibutyag sa Sun.Star Superbalita nga pagpanglugos ang unang motibo nga ilang nasayran sa maong insidente.
Gisaysay niini nga nagbaklay ang biktima samtang pauli na sa puloy-anan dihang gitabo sa usa ka wala mailang lalaki.
Gibira sa lalaki si Claide sa ngitngit nga bahin hinungdan nga gibati og grabeng kakulba ang dalagita.
Unang gisuwayan og lugos ang biktima uban sa paghinol niini sa pribadong parte apan nisukol si Claide pinaagi sa pagsagpa ug pagsipa sa suspetsado hinungdan nga nasuko kini.
Giingon pa sa suspetsado nga kung musokol lubaon ug patyon apan padayon si Claide sa pakigbugno hinungdan nga deretso kining giluba sa makadaghan nga higayon.
Wala pa nakuntento ang suspetsado, gikuha pa niini ang kantidad nga P300.00 sa biktima ug dali nga mibiya.
Nakapangayo pa og tabang si Claide bisan paman nga nagkadugo na ang iyang dughan hinungdan nga dali sab nga gitabangan sa mga nakakita ug gidala sa Northern Mindanao Medical Center.
Matud ni Rojo, anaa pa sa pagka-shock ang biktima ug dili pa makahatag og kumpletong diskripsiyon sa suspetsado gawas lamang sa pagsaysay niini sa nahitabo ngadto kaniya.
Gani kritikal ang kahimtang niini dihang gidala sa balay tambalanan apan deretso kini sa operating room sa pagtuong nilahos ang kutsilyo sa kasing-kasing apan swerte nga luwas na sa makuyawng kahimtang ang biktima ning panahona.
Sa pagsulat ning balita, padayon pa ang gihimong imbesitigasyon sa kapolisan aron pag-ila ug pagsikop sa suspek.