NIADTONG Nobiyembre 1990 gitamparos ang Cebu sa bangis nga bagyong Ruping. Niliki ang tunga-tungang bahin sa Mactan-Mandaue bridge hinungdan nga gipasirad-an sa gobiyerno ang maong tulay.

Lisod ang transportasyon pagtabok sa isla sa Lapulapu. Ang mga barge sa pamilyang Ouano maoy temporaryong gigamit paghatod og mga pasahero ug mga sakyanan sa pikas isla.

Usa ka buntag niana, gi-report sa Bombo Radyo Cebu ang nahitabong pagpangharass sa anchorman nga si Bobby Nalzaro ug kaubang mga reporter.

Sayo sa buntag, nagkuyog kami ni Bobby Nalzaro, ang anchorman sa Zona Libre kaniadto, paingon sa Ouano wharf o sa pribadong pantalan sa pamilyang Ouano.

Nianang gabii pa, gihisgutan sa Bombo Radyo ang giingong overcharging sa pamasahi nga gikolekta sa mga Ouano. Tungod niini nasuko pag-ayo ang mga Ouano.

Niabot kami sa Ouano wharf mga 7 pasado sa buntag, panahon nga nag newscast si Bombo Manny Rabacal sa Bombo News and Views.

Gibilin ko sa among patrol samtang nisud sila si Bobby Nalzaro, drayber ug laing reporter sa pantalan.

Samtang naglingkod dunay usa ka tawo nga miduol ug kalit lang mitamparos sa akong ulo, "Ikaw ba si Bobby Nalzaro."

Akong namatikdan ang usa ka pison giparada atubangan sa among patrol unya dunay laing sakyanan giparada usab sa likod - sa laktod na-trap ang patrol ug dili na makagawas.

Dali ko nga nibiya sa dapit. Gitagoan ko sa PUJ drayber ug gihatod sa sibyaan.. Gi-report nako ang nahitabo sa programa ni Rabacal.

Nahibaw-an sa tanang radio station ang panghitabo. Naghiusa ang tanan sa pagkomentaryo ug pagpangita sa mga personahi sa Bombo Radyo.

Mga 10 sa buntag niabot na si Bobby Nalzaro ug gidala kami ngadto sa dyLA. Mao kadto ang unang higayon nga nagkita kami ni Cerge Remonde. Iya kong gi-interbyu bahin sa nahitabo. Sukad niadtong sige na kami og kita ni Cerge isip amo siyang opisyal sa KBP. Unya nagka-uban kami sa Sun,Star Cebu kay usa man siya ka columnist.

Gitabangan mi si Cerge pagpangita og katarungan sa among gidangatan. Dili lang kadto maoy unang higayon nga aktidong milaban si Cerge sa mga media taliwa sa kahigpit sa kompetisyon sa radio. Gilubong si Press Secretary Cerge Remonde niadtong Dominggo.

Adios na Cerge. Usa ka sa bayani sa mga journalist.