LIBOAN ka mga nagkadaiyang matang sa mga bala ang napalgan didto sa probinsiya sa Maguindanao.

Subay sa taho sa tactical Command Post sa 6th Infantry (Kampilan) Division sa Philippine Army, alas 11:00 sa buntag niadtong Dominggo, gisulod sa hiniusang puwersa sa militar ug kapulisan ang maisan ni kanhi Maguindanao Vice Governor Akmad Ampatuan, didto sa barangay Poblacion Mamasapano.

Nakuha sa mga otoridad ang mga bala nga gilangkuban sa 3,040 nga mga bala sa caliber 7.62 MM; 420 rounds sa 5.56 MM; 3,900 bala sa 5.56 alang sa K3 light machine gun; 4,000 rounds sa caliber 30 machinegun; 17 rounds sa high explosive; 90 MM bala sa recoiless rifle; 48 ka bala sa 81 MM high explosive mortar shells; 90 ka mga bala 60MM high explosives mortar shells ug 3,700 rounds sa bala sa caliber 50 heavy machine gun.

Gisulti ni Maguindanao Police Provincial Director Senior Superintendent Alex Linesses nga ilang pang gipangita ang mga armas nga apil sa mga balang nakuha tunga-tunga sa umahan ni Vice-Governor Akmad Ampatuan kinsa usa sa mga suspek sa mangilngig nga masaker sa Maguindanao.

Nagtuo si Linesses nga gigamit ang mga armas sa mga Private Armed Groups sa pamilyang Ampatuan nga hangtud karon nagtago-tago gikan sa mga otoridad.

Mga bala nga nakalutan sa Maguindanao dunay tatak nga Department of National Defense-Armed Forces of the Philippines nga posibleng napalit gikan sa mga opisyal sa kasundaluhan nga nagsuporta sa mga Ampatuan. (Edgardo Fuerzas)