DUHA ang grabeng naangol sa nahitabong pagpamusil didto sa probinsiya sa Maguindanao.

Ang kapulisan nag-ila sa mga biktima nga sila si Brahim Taub, 27 anyos ug Bailanie Lumambas, 21, ug mga molupyo sa barangay Dalican, Datu Odin Sinsuat.

Sumala sa report nga nakuha gikan sa Maguindanao Police Provincial Office, alas 7:00 sa gabii, Enero 24, nahitabo ang insidente.

Samtang naglingkod ang mga biktima duol sa ilang pinuy-anan kalit nga mibutho ang wala mailhing mga armadong kalalakin-an ug gipamusil sila gamit ang kalibre .45 nga pistola ug baby armalite.

Dihang nahagba ug naligo na sa kaugalingong dugo ang mga biktima, mga armado dali nga misibat palayo sa lugar sakay sa usa ka motorsiklo paingon sa wala matino nga direksyon.

Mga biktima dali nga gisapupo ug gidala sa Cotabato Regional and Medical Center sa siyudad sa Cotabato.

Ang duha anaa sa talandugong kahimtang.

Nagtuo si Maguindanao Police Provincial Director Senior Superintendent Alex Linesses nga posibleng away sa pamilya ang motibo sa pagpamusil.

Kapulisan padayong nag-imbestiga aron masuta ang motibo sa krimen samtang giukoy na sab nila ang mga suspek sa hitabo. (Edgardo Fuerzas)