PAO Defenders nisalo na sa NBI-10

NISALO ang Public Attorney’s Office (PAO) Defenders sa National Bureau Investigation Region 10 (NBI-10) aron parehas mangulo sa nagpadayon nga 2018 Travelers Invitational Basketball League.

Kini, human maposti sa PAO ang ilang ika-duhang daug agi sa 53-36 nga pagpilde sa CVL Maguindanao sa unang dula niadtong Huwebes didto sa 4rth Infantry Division Gym, Barangay Patag.

Nibira si Monchit Collera og 15 puntos aron mangulo sa Defenders, samtang niabag sab sila John Salva ug Jog-Jog Dingal og 12 ug 8 puntos, sunodsunod.

Kusog ang pagsugod sa Defenders human miabri sila og 19-6 run paghuman sa first quarter ug nainat pa ngadto sa 15 puntos nga labaw pagsirado sa half time sa iskor 29-14.

Napalobo pa nila ngadto sa 17 puntos sa third quarter, apan nakasinati sila og kabalaka pagtunob sa sunod quarter.

Nihulga ang CVL sa unang duha ka minutos sa kataposang fourth quarter human mangulo si Ferdinand Linaac og rally agi sa iyang tres.

Apan, kulang og pulbora ang ilang pag-rally ug igo lang sila nipaduol og 10 puntos nga biya.

Gikan ana, gitumban sa Defenders ang pedal aron mabalik ang taas na sab nga labaw paingon sa kadaogan.

Nitala sab si RJ Yacapin og 12 puntos sa kapildehan sa CVL Maguindanao, samtang niabag sab si Linaac og 11.

“Kulang sab kami atong dula tungod sab aha mao ang uban nga saligando namo wala diha,” ingon ni Yacapin, kinsa sab nagpasalamaton sa ilang sponsors nga ang Nobles Seafoods and Grill, Barra Opol chairman Jun Otacan ug team manager Gerbie Gabutan.

Parehas na ang PAO ug NBI-10 nga dunay 2-0 win-loss card sa nagpadayon nga round-robin elimination round.

“We are happy in our second win and hope we could keep it up,” ingon ni Atty. Neil Sabundong, kinsa ang team captain sa PAO.

Apan, magbinal-anay ang PAO ug NBI-10 sa kinsa mohawid sa solong liderato pag-agbat nila karong adlawa, Hulyo 12.

Sa ikaduhang dula, naangkon sa Integrated Bar of the Philippines Misamis Oriental Chapter (IBP-MisOr) Lawyers ang ilang unang daug human gihatdan nila ang unang kapildehan sa CVL/MAC/COM/COS agi sa 50-31 nga kadaogan.

Bag-o sa dula, nakadawat og impormasyon agi text message si Abogado Robbie James Yparaguirre sa IBP MisOr nga gipreparahan siya og husto sa CVL/MAC.

Apan, wala nagmalampuson ang CVL/MAC human mangulo si Yparaguirre sa Lawyers agi pagpupo og 12 puntos nga adunay duha ka tres sa first quarter.

“Natingala lang ko kay gibabagan ko sa akong strong side sa tuo mao nga nag-shift ko sa wala apan nagpasalamat ko nga my teammates delivered also,” ingon ni Yparaguirre.

Niabag sab nila Roell Valledor ug Nasif Abaton 10 ug 8 puntos, sunodsunod.

Nidula ang CVL/MAC nga wala ang ilang usa sa saligando nga si Melber Alinas, kinsa nihuman og 16 puntos nga adunay upat ka tres niaging semana.

1st Game

PAO 53 -- Collera 15, Salva 12, Dingal 8, Casimero 6, Rafael M. 6, Llego 2, Sumondong 2, Jabines 2, Gaya 0, Bana 0, Uy 0

CVL Maguindanao 36 -- Yacapin 12, Linaac 11, Dungca 6, Paje 6, Uroda 3, Baguio 0, Gabutan 0

2nd Game

IBP MisOr 50 -- Yparaguirre 12, Valledor 10, Abaton 8, Bartolome 7, Bonete 6, Garcia 6, Barsaga 2

CVL-MAC 31 -- Bajenio 12, Pacuribot B 5, Awing 4, Gabut 3, Gabe 2, Pacuribot J 2, Galendez 0, Pacatang 0, Pacuribot N 0, Ursal 0.

Dula karon (Hulyo 12) didto sa Gamma Farm Gym:

6:30 p.m. -- Eagles vs Ruffians

7:30 p.m. -- NBI vs PAO

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph