USA ka lalaking adunay orden de aresto ang nasikop sa kapulisan human niadto sa police station alang sa usa ka transaksyon.
Ang dinakpan, mao ang mag-uumang si Rogelio Salule, 24 anyos, sakop sa tribong B'laan, ug molupyo sa Barangay Takub, lungsod sa Kiblawan, Davao del Sur.
Ang kapulisan sa Kiblawan, nagkanayon nga miabot sa ilang buhatan ang dinakpan aron mokuha og kopya sa mga dokumento labot sa kaso ni Setol Tayok Salule.
Apan, matod sa kapulisan nga sa dihang ilang gisusi ang maong tawo nasuta na hinuon nga aduna diay kini warrant of arrest.
Sigun sa taho, gipagula ni Judge Albert Axalan sa Regional Trial Court (RTC) Branch 20 ang mandong pagsikop ni Salule tungod sa kasong murder.
Si Senior Inspector Ferdinand Casiano, hepe sa pulis sa lugar, nagbutyag nga kauban ang dinakpan nila ni Koli Bongan sa criminal case number 322 (09) alang sa kasong murder nga gipagula niadtong Disyembre 7, 2009.
Wa hinuon nakauli sa ilang pinuy-anan si Salule sanglit gipasud dayon kini sa selda sa kapulisan. (Dondon Dinoy)