SECTIONS
Monday, September 24, 2018
SUPERBALITA CAGAYAN DE ORO

Presensya sa mga bakwit wala na gikahimuot

GIINGONG maximum tolerance na ang gihimo sa pipila ka mga empleyado sa Kapitolyo kalabot sa mga bakwit nga usa na ka bulan kapin sa Kapitolyo human apektado sa giyera sa Banglay, lungsod sa Lagonglong, Misamis Oriental.

Gibutyag ni Lorna Guibone, head sa Maintenance Sa Capitol Park, nga walay pagdayeg ang mga bakwit sa gihimo nga serbisyo sa Kapitolyo.

Kini human giingong nagpalakaw og estorya ang mga bakwit nga gipasagdan sila sa Kapitolyo ug wala gihatag ang ilang panginahanglan.

Matud ni Guibone nga dunay report nga moabot pa og duha ka tuig ang bakwit sa dapit.

"Mag-resign ko bah. Kay magkunsimisyon ko nila," matud ni Guibone sa SunStar SuperBalita.

Dismayado sab si Atty. Jeffrey Saclot, head sa Provincial Tourism Department, tungod kay niadtong Lunes atol sa flag raising sa Kapitolyo, nagpatunga og kalit ang mga bakwit ug nag-drama nga nagpapatay-patay.

Kini aron ipaabot kanila nga napasagdan sila og maayo sa kapitolyo ug dismayado sa wala pag-atubang ni Governor Bambi Emano kanila.

Matud ni Saclot nga unta respetuhon sa mga bakwit ang kalihokan sa probinsya lakip ang pagpakayab sa nasudnong bandila tungod kay kon adunay dili morespeto niini posibleng makasohan.

Sa iyang bahin sab ni Emano, aminado kini nga pipila sa mga empleyado wala na mahimuot hilabina nag skedyul ang mga empleyado nga molantaw sa ilang panginahanglan.

Wala sab niini gisapayan ang pagbiay-biay kaniya sa mga bakwit apan gipasabot niini nga iyang dawaton ang pagbiay biay dili lang ngadto sa iyang mga empleyado.

Giklaro sab niini nga kung duna man butang nga wala niya mahatag kini mao ang pagpahawa sa mga sundalo tungod kay wala siyay gahom hilabina ubos sa Martial law ang pulo sa Mindanao.

Samtang si Sariza Acosta, tigpamaba sa mga bakwit, ni ingon nga humana ang flag raising usa sila nagpadayag sa ilang kadismaya.


VIEW COMMENTS