SECTIONS
Monday, September 24, 2018
SUPERBALITA CAGAYAN DE ORO

Li-og sa lalaki gigulgol

PATAY ang usa ka lalaki human gigulgol ang liog sa wala mailang suspetsado niadtong Hulyo 10 diin gibana-banang nahitabo mga alas 11 sa buntag sa Brgy. Sta. Ines, lungsod sa Talisayan, Misamis Oriental.

Giila ang biktima nga si Leonilo Pugahan, 40, minyo, residente sa susamang dapit.

Si Police Officer 3 Orlando Condez, imbestigador sa Talisayan Police Station, nibutyag sa SunStar SuperBalita nga sa pagkakaron dili pa nila matumbok ang motibo sa krimen.

Alas 2 na kapin sa hapon miabot kanila ang report nga dunay gipatay ug gigulgol ang liog diin gamay nalang ang naghawid nga maputol gayud kini.

Nasayran nga nagpuyo lamang sa payag ang biktima nga anaa sa bukid nga bahin ug sugo-sugoon lang sa mga silingan.

Matud ni Condez nga adunay nanag-iya sa maong payag nga maoy unang mi-report sa insidente ngadto sa mga opisual sa barangay kinsa lakip karon sa gikonsiderang person of interest.

Ang mga silingan lakip mga opisyal niingon sab nga wala kini mga gikabangi sa dapit bisan paman sa Brgy. Mintabon diin nakapuyo sa nagmaneho pa kini og habal-habal.

Ang patay’ng lawas anaa na sa Gomez funeral Homes ug gitawagan na sa kapolisan ang paryente sa biktima nga pulos nagpuyo na sa dakbayan sa Cagayan de Oro.


VIEW COMMENTS