SECTIONS
Sunday, December 16, 2018

Bangi sa 2 ka sikyu misangko sa ilang kamatayon

DAAN nga panagbangi ang nakaingon sa pagpinusilay sa duha ka mga security guard nga nisangko sa kamatayon sa duha.

Patay nang nakaplagan sa mga pulis ang duha alas 11:30 sa milabayng gabii gawas ug sulod sa usa ka convenience store sa Total gas station sa may Osmeña street, North Reclamation Area,Barangay Mabolo, siyudad sa Sugbo.

Ang duha pulos dunay mga samad pinusilan sa ilang mga lawas.

Ang mga gwardya giila nga silang Anjen Lagmay, 21, ug Junifer Teniano, 24, nga taga Guihulngan City, Negros Oriental.

Naa sa tupad sa lawas ni Lagmay ang kalibre 9mm samtang sa lawas ni Teniano ang kalibre .45 nga pistola.

Usa sa mga saksi nitug-an sa mga imbestigador sa Mabolo police station nga ilang nabantayan ang panag lalis sa duha ka mga gwardya ug nisunod na dayon ang buto-buto sa armas.

Ang gwardya sa Cebu Port Authority (CPA) nga atbang sa nahitaboan nga giila nga si Richard Quirante ug Jerome Ponting mao na ang nanawag sa police station sa Mabolo aron ipahibawo ang nahitabong pinusilay.

Matod sa hepe sa Mabolo police station, Senior Inspector Dindo Alaras nga si Lagmay maoy nagbantay sa Total gas station samtang si Teniano nadestino sa South Road Properties nga niadtong orasa naka duty.

Dumot o drugas?

Nagtuo si Alaras nga dumot ang usa sa hinungdan sa pagpinusilay sa duha ka mga sikyo apan wala usab nila wad-a ang posibilidad nga adunay kalambigitan sa illegal nga drugas ang hitabo.

Gipasabot ni Alaras nga sa paghiling sa lawas ni Teniano, nakakuha silag pinakete sa illegal nga drugas sa bulsa niini.

“Ang nakita raman gud sa mga saksi, naay nahitabo nga commotion unya nisunod dayon ang buto-buto sa armas. Posibling naa na ni silay bikil ba, pero naa may nakuha nga drugs ug drug paraphernalia ato sad na tan-awon,” matod ni Alaras.

Ang igsuon ni Teniano nga usa usab ka gwardya sa usa ka establisemento duol sa nahitaboan nitug-an sa mga imbestigador nga di magkaila ang iyang igsuon ug sa gwardya sa gasoline station nga iyang gikapinusilay.

Apan matod ni Alaras nga ilang ipatawag pa ang igsuon sa Mabolo police station aron kakuhaan sa iyang habig.

Makig alayon usab sila sa mga security agency diin nahisakop ang duha ka mga gwardya aron ipaubos nila ang duha sa background investigation.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!