NAAY pagtuo nga dunay nagmaya sa pagkahagsa sa net satisfaction rating ni Pangulong Rodrigo Duterte sa uwahing resulta sa survey nga gihimo sa Social Weather Stations (SWS).
Mahimo nga ang usa sa mga nagmaya ning higayona mao ang mga kaaway ni PRRD sa politika ug ang mga kritiko sa iyang administrasyon.
Subay sa resulta nga gihimo sa ikaduhang kuwarter sa 2018, nahimong +45 na lang ang satisfaction rating ni PRRD gikan sa +56 niadtong Marso kon diin mihagsa kini og mokabat sa 11 puntos.
Ang grado ni PRRD niadtong Hunyo naa sa 11-puntos nga ubos gikan sa iyang grado nga +56 o “very good” niadtong Marso. Pinakaubos kini itandi sa milabay nga ubos usab nga iskor nga +48 o “good” niadtong Septyembre 2017.
Sa survey niadtong Hunyo, 65 porsiyento sa mga Pinoy nag-ingon nga tagbaw sila kaniya samtang 20 porsiyento wala matagbaw. Niadtong Marso, 70 porsiyento natagbaw ug 14 porsiyento wala matagbaw, nga nagpakita sa gross satisfaction rating nga natagak og singko porsiyento nga puntos.
Apan bisan pa niini, giseguro sa Malacañang nga padayon ang dobleng kayud sa pagtrabaho ni PRRD ug mga miyembro sa sa gabinete.
Gikanayon ni Presidential Spokesman Harry Roque, wala sila matarog sa resulta sa survey ug mas magpursige sila aron nga mapanindot pa ang ekonomiya ug mapakusog ang kampanya sa gobyerno batok sa ilegal nga druga, krimen ug kurapsiyon.
Hinuon ang grado nga nakuha ni PRRD pinakataas gihapon itandi sa mga kanhi presidente sa nasud nga sila si Joseph Estrada, Gloria Macapagal Arroyo ug Benigno “Noynoy” Aquino sa samang panahon o pagkahuman sa ilang ikaduhang tuig nga termino.
Nasayran sab nga gihimo ang survey pipila ka adlaw human gitawag ni PRRD ang Ginoo nga “stupid”, nga nakaaghat og daghang batikos gikan sa mga lideres sa Simbahang Katoliko ug sa Evangelical nga mga simbahan nga posibleng nakatampo og dako sa pag-ubos sa grado sa Presidente.
Busa ang pangutana, angay ba gyud nga magmaya ang mga kritiko ug kaaway sa politika ni PRRD?