SECTIONS
Friday, December 14, 2018

Delos Reyes: Ang dila ni Digong

Yanong Pagsabot

GINAANGKON mismo ni Presidente Rodrigo Duterte atubangan sa daghang katawhan nga bastos siya'g baba. Gani man tungod sa iyang taras sa iyang pagkatawo makadaghan nga gisilotan siya sa iyang mipanaw na nga inahan, Nanay Soleng Duterte, ug ginapaluhod nga nagdupa apan nagpabilin ang iyang kinaiya hangtud karon.

Niadtong panahon sa iyang paglibot sa tibuok nasud sa pagpangampanya mas gisunod siya sa katawhan tungod sa iyang estilo sa iyang binugoy nga sinultihan diin iyang ginagamit ang linguwahe sa kalye. Kanunay sab nga malibkas sa iyang ngabil ang pagpamalikas apan siya mismo ang nagasulti nga ayaw lang ninyo baliha o lainon pagsabot ang iyang baba kay lahi ang ginabati sulod sa iyang dughan kon ang sitwasiyon na sa katawhan labi na ang mga kabus ang hisgutan.

Atong mahinumdoman nga naapil sa iyang pagbalikas ang Santo Papa tungod sa problema sa trapiko nga iyang nasinati didto sa kaulohan. Daghan ang mialma ug mibatikos kaniya ug gigamit nga isyu sa politika apan wa misaler kay nakadestino na siya ug gitahasan nga maoy mahimong pangulo sa atong nasud, ang resulta dul-an 17 milyon ang miboto kaniya.

Daan sab siya mibahad nga daghan ang mamatay kon siya na ang mahimong Presidente sa nasud. Miawhag pa man gani siya sa mga gustong mag- negusyo nga magtukod og punerarya kay mamahimo kining “patok” nga negusyo sa iyang termino.

Gidawat gihapon sa katawhan ang iyang bahad, wa gihapon kini nahimong babag sa iyang dalan pagsulod sa Malacañang ug natinuod nga mibanaw ang daghang dugo sa mga nalambigit sa ilegal nga druga apil na ang mga dagkong tawo. Mayor, General labi na ang gagmay nga misukol sa kapulisan tungod nahimong kabahin sa krimen sa ilegal nga druga.

Sa miaging adlaw, nakighinabi si Presidente Digong kang Msgr. Romulo Valles, ang Presidente sa Catholic Bishop Conference of the Philippines tungod sa pagbatikus ni Digong sa Diyos ug pagbutyag sa hiwi nga binuhatan sa pipila ka mga pangulo sa simbahan, mga pari ug uban pa nga ginatuohang nakig-alyado sa mga buot mopahagsa sa administrasyon ni Duterte.

Magkasinabot man si Msgr. Valles ug Pangulong Digong kay niadtong panahon sa iyang pagpangampanya misaad man gani sa iyang kaugalingon ang pangulo nga mobayad siya'g multa sa simbahan sa kantidad hga P500 panahon nga makapamalikas siya. Hinuon, wa may gipirmahan nga kasabutan hangtud kanus-a, basin na-expire na mao nga balik na sab siya sa pagpamalikas bisan sa publiko.

Sa akong yano nga panglantaw daw naanad na si Digong nga dawat sa katawhan labi na sa mga taga dakbayan sa Davao nga iyang gidumala sa taas nga katuigan ang iyang estilo sa sinultihan apan dili kini madawat sa uban kon sa tibuok nasud na ang hisgutan.

Dili ikalimud nga tungod sa iyang nabuhat gisakyan kini sa iyang mga kontra ug misawsaw na sab ang mga langyaw kay kabahin kini sa ilang laraw nga paphaon siya gikan sa iyang pagka-Presidente tungod lahi sab ang ilang agenda unsay mahimong dagan sa atong nasud nga pabor alang kanila.

Busalan unta ni Digong ang iyang dila aron mapugngan ang mga pulong nga makasiak sa panaghiusa.

Sa basahon sa Santiago, Kapitulo 3, Bersikulo 5 nagkanayon, “Ingon man usab ang dila usa ka bahin nga diyutay sa lawas, ug nagapangandak sa dagko nga mga butang. Tan-awa, daw unsa kadako nga kalasangan ang ginadaigan sa usa ka diyutay nga kalayo”.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!