SECTIONS
Wednesday, September 26, 2018
SUPERBALITA DAVAO

2 barangay giatake sa BIFF

KIDAPAWAN CITY -- Gihasi sa mga miyembro sa Bangsamoro Islamic Freedom Fighters (BIFF) ang duha ka mga barangay sa Pigcawayan sa probinsiya sa North Cotabato alas 9:20 sa gabii niadtong Martes, Hulyo 10.

Sa taho gikan sa North Cotabato Police Provincial Office nga gisulod sa grupo ni Kumander Aguila sa BIFF ang mga barangay sa Malagakit ug Bulucaon sa Pigcawayan sa nahisgutang probinsiya.

Sakay ang mga rebelde sa upat ka bangkang de motor subay sa Rio Grande de Mindanao pasulod sa Libungan Toreta River.

Apan namatikdan dayon kini sa mga sibilyan ug gipahibalo ang ilang mga barangay opisyal nga maoy mitawag sa militar ug kapulisan.

Nahiabot sab dayon ang puwersa sa 34th Infantry Battalion, Philippine Army nga gipangulohan ni Lieutenant Colonel Angelo Lutera.

Naengkuwentro dayon sa mga sundalo ang mga rebelde nga milungtad sa usa ka oras una miatras paingon sa Maguindanao Province.

Walay naangol o napatay sa militar apan di pa matino sa bahin sa grupo ni Kumander Aguila.

Padayon pa sab ang combat clearing operation sa militar batok kanila sa Pigcawayan. (Edgar E. Fuerzas)


VIEW COMMENTS