SA Social Weather Stations survey niadtong Hunyo 27-30, 2018- 65% sa mga hamtung nga Pilipino ang natagbaw sa nahimo ni Presidente Rodrigo Duterte samtang 20% ang wa matagbaw. Ang 15% wa makadisisyon. Miminus kini og 5 puntos gikan sa 70% nga natagbaw samtang 14% lang unta ang wa makauyon sa performance ni Duterte niadtong miaging Marso.
Niining bag-ong survey 45% ang net satisfaction rating ni Pres. Duterte nga suma sa SWS “good”. Sa SWS terminology alang sa Net Satisfaction Ratings: +70 and above, “excellent”; +50 to +69, “very good”; +30 to +49, “good”; +10 to +29, “moderate”, +9 to -9, “neutral”; -10 to -29, “poor”; -30 to -49, “bad”; -50 to -69, “very bad.” Miminus ang rating sa presidente og 20 puntos sa Metro Manila, 18 puntos sa Visayas, 6 puntos sa ubang dapit sa Luzon og bisan sa iyang balwarte sa Mindanao miminus og 6 puntos. Daghang nagtuo nga ang pagtawag ni Duterte nga estupido ang Dios maoy nakawa sa pagsalig sa ubang tawo kaniya.
Mao kini ang survey question: “Maaari po bang pakisabi ninyo kung gaano kayo nasisiyahan o hindi nasisiyahan sa pagganap ng tungkulin ni RODRIGO DUTERTE bilang Presidente ng Pilipinas. Kayo ba ay lubos na nasisiyahan, medyo nasisiyahan, hindi tiyak kung nasisiyahan o hindi, medyo hindi nasisiyahan, lubos na hindi nasisiyahan, o wala pa kayong narinig o nabasa kahit na kailan tungkol kay RODRIGO DUTERTE?”
Sa laing bahin ania ang resulta sa Pulse Asia survey alang sa posibling mokandidato sa pagka-senador nga gihimo niadtong Hunyo 15-21:
Sen. Grace Poe 2. Rep. Pia Cayetano 3. Sen. Cynthia Villar 4. Davao City Mayor Sara Duterte Carpio 5. Sen. Edgardo Angara, Jr. 6. Ex-Sen. Jinggoy Estrada 7. Kanhi PNP Chief Ronald “Bato” dela Rosa 8. Sen. Koko Pimental 9. Sen. Nancy Binay 10. Ex-Sen. Serge Osmeña 11. Ex-Sen. Lito Lapid 12. Sen. JV Ejercito. Nagsunod si Sen. Bam Aquino. Layo kaayo sila si Bong Go, Harry Roque, Rep. Gloria Macapagal Arroyo ug Mocha Uson. Layo usab sa Magic 12 si Mar Roxas.
Suma sa Malacañang nga layo pa ang eleksiyon. Buot ipasabut nga moapas sa dili madugay si Roque, Bong Go ug ubang kandidato nga suod sa Malacañang nga nangiwit.
Sa pulitika sa Sugbo, gituhoan nga mahimong bise ni Gob. Junjun Davide mao ang usa sa mga anak ni Ramonito Durano. Tuyo niya nga makuha ang botos sa taga-Danao City. Kahinumduman nga sa dihang si Gwen Garcia gipaluyohan pa ni Ramonito midaug kini pagka-gobernador. Apan sa pagsunod piniliay diin nagsakbang sila pag-usab, si Davide nga mao nay gipaluyohan ni Durano mao na ang napiling gobernador. Apan daghan ang nagduda nga mahuyang na ang mga Durano kon mahinayon og dagan pagka-mayor ang anak ni Duterte nga si Baste. Samtang si Daanbantayan Mayor Vic Loot mipahibawo nga dili na siya magpapili pagka-mayor. Di na siya moapil sa pulitika kay iya kunong lig-unon ang iyang security. Gituhoan nga ang iyang anak nga si outgoing Provincial Board Member Sun Shimura maoy modagan sa pagka-mayor.
(msr1144@yahoo.com)