SECTIONS
Friday July 20, 2018
SUPERBALITA CEBU

Sugilanon: Wa na mohilak ang kasingkasing

Lamberto G. Ceballos

Cawayan, Dalaguete, Cebu

BANG! Milanog ang usa ka buto sa halawom nga kagabhion. Milagingling sa upat ka bungbong sa iyang lawak. Nalup-og si Ellen sa iyang kama. May mga luhang miagay sa iyang mga mata. Naghilak pod ang iyang kasingkasing. Sa diyutay nga mga gutling sa iyang kinabuhi nahinumdom siya.

“Ellen, honey, ikaw gyud ang akong ikuyog ngadto sa altar sa kaminyoon,” pasalig ni Treddy human sa ilang pagminahalay sa ibabaw sa kama sud sa usa ka motel. “I love you so much!”

“Salamat, Tred! I love you, too!” ni Ellen nga migakos kang Treddy ilawom sa habol. “Mao bitaw nga misugot na ko sa imong hangyo ganina nga anhi ta matulog karong gabhiona. Gitugyan ko na kanimo ang akong tanan. Ikamatay ko kon imo kong luiban.”

“Di na mahitabo, Hon. Ako ang patya kon magluib nimo,” ni Treddy, dayong halok sa mga ngabil ni Ellen.

Nanginit pag-usab ang ilang kalawasan ug gisubli nila ang ilang pagminahalay ibabaw sa kama. Miundang sila nga pulos natagbaw sa matam-is nga saro sa gugma nga ilang gisalohan pagdimdim. Nasundan pa kini’g laing mga higayon.

Usa ka buntag samtang didto si Ellen sa iyang gialagaran nga kompaniya isip sekretarya nakadawat siya’g tawag sa selpon gikan ni Treddy.

“Hon, molarga ko karon para Canada. Aprobado na akong working visa. I’ll be away for three years. Inigbalik nako magpakasal na ta,” ni Treddy.

“Uy! Wa man ka maghisgot ini sa una, Hon! Nakalitan ko da! Pero, okey. Para man sad na sa atong maayong kaugmaon, di ba?” ni Ellen. “Magkita ta una ka molarga!”

“Di na lang. Dia na ko sa MCIA. Flight nako para Manila karong alas diyes.”

“Okey. Amping, Hon! Von voyage! Tsup! Tsup! Tsup!” ni Ellen nga mipatunog sa iyang mga ngabil og flying kiss.

“Ikaw sab, Hon! Take care! Tsup! Tsup! Tsup!” ni Treddy.

“Pero, Hon, daghan ra bang mga babayeng Canadian nga mga gwapa. Basi’g magluib ka nako,” ni Ellen nga kalit nasubo ang panagway. “Maghikog gyud ko!”

“Ha?!” ni Treddy. “Ohhh, don’t you worry! Sa giingon ko na, inigka human sa akong kontrata sa Canada mouli ko aron magpakasal ta.”

“Misalig ko sa imong saad, Hon! Paabuton tika,” ni Ellen.

Paglabay sa duha ka tuig nakadawat si Ellen sa iyang email account gikan mismo ni Treddy nga nakasal na siya sa usa ka Pinay nga kauban niya sa trabaho kay nagmabdos kini sa bunga sa ilang paghinigugmaay. Kalit nga nahugno ang tibuok kalibutan kang Ellen. Duro niyang hilak. Gihigugma niya si Treddy sa tibuok niyang kasingkasing ug kalag. Wa nay lain pang lalake nga makailis niini sa iyang kinabuhi.

KAGANIHA mitrabaho siya. Gikawat niya ang rebolber sa iyang manedyer gikan sa hunos sa lamesa niini kay may duplicate key man siya. Ug ning gabhiona tumanon niya ang iyang saad nga magpakamatay kon magluib si Treddy kaniya.

Sa wa pa niya kablita ang gatilyo sa rebolber tumong sa iyang ulo, gipaagay ni Ellen ang daghang mga luha sa iyang mga mata. Miduyog paghilak ang iyang kasingkasing. Dugo ang gihilak sa iyang kasingkasing. Unya inanay nga napawong ang iyang panan-aw. Dungan sa katapusan niyang gininhawa, mihunong paghilak ang iyang kasingkasing. (Katapusan)


VIEW COMMENTS