GIKAN sa usa ka yanong pagatpatan natukod ang bantugang kan-anan sa probinsya sa Leyte, ang Pagatpat Seafood Restaurant.
Nagkadaiyang mga pagkaong dagat nga giluto sa managlaghing pamaagi ang makatagbaw ug makapatul-id sa tinai sa mga makasuroy ning dapita.
Ang Pagatpat Seafood Restaurant nahimutang sa Sta. Fe, lungsod sa Matalom. Gitung-an kini sa Bato, Leyte ug Maasin City, Southern Leyte.
Gawas sa lamiang mga pagkaon, mokawat sab og dakong atensyon ang disenyo sa kan-anan nga haom sa usa ka pagatpatan -- hayahay, presko ang hangin ug nindot ang talan-awon nga nagpakita sa kaanyag sa kinaiyahan.
Samtang ikaw magkaon, maabot sa imong panglantaw ang bantugang Canigao Island.
Adunay nagkatag nga mga cottage nga gipang-ugbok sa tungatungang bahin sa pagatpatan.
Aron makaabot ka sa lain nga cottage, kinahanglan kang mosubay sa taytayan nga kawayan nga nakadugang sa iyang pagkatalagsaon.
Unya ang kantidad sa mga pagkaon, sakto ra, di tantong barato ug di sab tantong mahal.
Ingnon ta lang sa pagsulti, bisan pilay mahabwa gikan imong bulsa o pitaka, mouli ka nga di magmahay.
Ang magtiayong sila si Glenn Yosores Gorne, 43, ug Lucila Boyboy Gorne, 42, mao ang tag-iya ning kan-anan.
Aduna silay duha ka mga anak nga sila si Khorkina, 17, ug Kirstin, 14.
Ang magtiayong Gorne nahilakip sa yanong mga lumolupyo sa Leyte nga naghingaos sa matag adlaw nga pagpanginabuhi kaniadto.
Matod ni Glenn, kinsa gitawag sab og “Indoy” sa iyang kahigalaan, nga kaniadto, wa masud sa ilang alimpatakan nga magtukod og kan-anan.
Nagsugod lang ang tanan dihang kanunay silang magkan-anan sa pagatpatan kauban ang ilang mga higala gumikan kay hayahay.
“Mao tong nasulod sa among huna-huna nga mamaligya mig pagkaon sa pagatpatan,” matod ni Indoy.
Pulos pagkaong dagat ang ilang gibaligya gumikan kay niadtong higayuna, si Indoy usa ka labasera og mga isda, pasayan ug uban pang mga pagkaong dagat.
“Mag-motor man ko sa una unya bisan asa lang ko nga lungsod maabot og pamaligya,” saysay ni Indoy.
Nagkanayon si Indoy nga way hunong ang pag-abot sa mga tawo, kadaghanan mga adunahan nga magdala og awto, aron mokaon sa ilang kan-anan sa pagatpatan.
“Grabe lagi kadaghan ang mangaon sa among tinda. Usahay makasab-an ko sa customer kay tuga-tuga kuno mig baligya unya dugay kaayo mi maka-serve. Dili na man gud namo maato sa kadaghan,” matod ni Indoy.
Ning puntoha nakahuna-huna ang magtiayong Gorne nga palapdan ang ilang kan-anan ug magtukod og cottages sa nagkadaiyang suok sa pagatpatan.
Human niini, ang tanan tipik na lang sa kasaysayan sa ilang bantugang kan-anan.
Natukod ang Pagatpat Seafood Restaurant niadtong Mayo 10, 2014.