SECTIONS
Sunday July 22, 2018
SUPERBALITA CEBU

PYC uyon sa silot sa hazing

NIHANGOP ang Provincial Youth Commission (PYC) sa Sugbo sa pagpirma ni Pres. Rodrigo Duterte sa mas bug-at og silot nga Anti-Hazing Law.

Gipanghinaot lang sa PYC nga himuon usab nga mas istrikto ang pagpatuman niini.

Samtang, giawhag sa PYC ang mga tunghaan sa Sugbo nga monitoron, di lamang ang organisasyon sa mga fraternity ug sorority kundi lakip na usab ang ila mismong mga kalihukan.

Napirmahan na sa presidente niadtong Miyerkules ang Republic Act (RA) 11503 o Anti-Hazing Act of 2018. Mao kini ang amended version sa orihinal nga anti-hazing law nga napasar niadtong 1995, diin sud sa 23 ka tuig nga gipatuman ang balaod, usa pa lang nakombikto. Sa bag-ong Anti-Hazing act, mas bug-at ang mga penalty o silot.

Reclusion perpetua ug multa nga P3 milyones ang ipahamtang sa mga moapil sa hazing, ilabi na kon moresulta kini sa kamatayon, rape, sodomy o mutilation sa usa ka indibiwal.

Samtang, reclusion temporal usab ug P1 milyon nga multa sa mga anaa sa venue sa hazing ug niadtong mga mosuwat sa paghimo og cover up ug di mokooperar sa imbestigasyon bahin niini.

Gawas sa physical hazing, lakip sa bag-ong balaod ang emotional ug psychological hazing.

Matod sa Executive Director sa PYC-Cebu, James Canoy, maayo kini nga kalambuan aron usab paghatag ug leksiyon niadtong mga grupo nga padayong nipatuman ug hazing.

Nanghinaot siya nga di lang kutob sa pagpasar sa balaod ang mahitabo ug hingpit unta kini nga mapatuman.

Giklaro ni Canoy nga way dautan sa pag-apil sa mga fraternity ug sorority apan kinahanglang wa lay hazing nga mahitabo. (AZLG)


VIEW COMMENTS