SECTIONS
Monday, September 24, 2018
SUPERBALITA CEBU

Miareglo sa pulis gidakop

NASIKOP ang upat ka mga tawo sa gihimong buy-bust operation sa Parian Police Station sa Sitio Lomar, Barangay T. Padilla, siyudad sa Sugbo pasado alas 6:00 sa milabayng gabii diin usa kanila ang gipusasan dihang misuway pagsuburno sa mga pulis balor og P10,000 aron lang pabuhian ang mga dinakpan.

Ang mga nasikop giila nga silang Stephanie Sabanal nga maoy target sa anti-drug operation nga nakuhaan og dagkong putos sa gituohang shabu.

Lakip sa nadakpan ang naatlan nga nanuyop sa sud sa balay nga silang Cachila Portacos ug Maca Querobin.

Matod ni P/CInsp. Kenneth Paul Albotra, hepe sa Parian police station, nga nakadawat silag kasayuran gikan sa mga silingan sa mga dinakpan nga namaligya kini sa ilegal nga drugas.

Gipaubos una nila kini sa monitoring sud sa usa ka semana una sila milusad sa buy-bust operation nga miresulta sa pagkasikop kanila.

Apan samtang nagpadayon ang inventory sa mga nakuhang illegal nga drugas kalit lang nga miduol sa usa sa mga operatiba ang ginganlag Sieg Fredilyn Arroyo ug mihaylog kwarta balor P10,000 aron lang buhian ang mga dinakpan.

Gipahibawo dayon si Albotra nga gisuwayan silag suburno mimando dayon ni nga dakpon si Arroyo sa kalapasan sa Revised Penal Code alang sa corruption of public official.

“Ang ilang koan kay murag SOP na kuno ba kun naay dakop tagaan daw og kwarta ang police, iyang request nga i-release ang usa ka dinakpan right after ako gipananghiran si CD nga naa mi dakpon nga nag-bribe,” matod ni Albotra.

Wa malakip sa target list si Sabanal sanglit giila nila kini nga bag-ong player sa ilegal nga drugas sa barangay T. Padilla.

“Newly identified ni sila sir nya naa ni sa level 3 drug pusher ning atung nadakpan, gi surveillance nato sa dihang nakakuha tag information,” dugang ni Albotra.

Moabot sa P62,540 ang balor sa drugas nga nakuha sa ilang target nga gisusi pa kun asa kini magkuhaan sa iyang supply sa ilegal nga drugas.


VIEW COMMENTS