SECTIONS
Monday, September 24, 2018
SUPERBALITA CEBU

Diputado miawhag sa LGUs

NIREKLAMO ang labing taas nga opisyal sa Department of Agriculture sa Central Visayas batok sa mga local government unit (LGU) nga modiretso og reclassify sa ilang Comprehensive Land Use Plan (CLUP) nga dili mangayo og pagtugot sa ilang buhatan.

Si Atty. Salvador Diputado, regional director sa DA 7, nipadayag nga ubos sa Local Government Code ug Memorandum Circular No. 54 sa DA, kinahanglan sa di pa mo-enact og ordinansa ang mga LGU aron i-reclassify ang paggamit sa agricultural land ngadto sa usa ka subdivision o residential area, mangayo una kini og certification sa ilang buhatan.

Sigon niini kasagaran sa nahitabo karon, kuwang og certification for reclassification gikan sa DA ang mga LGU nga moduso og rekisitos sa Housing and Land Use Regulatory Board (HLURB) kay wa kini moagi sa ilang buhatan.

Matod niya nga base sa ilang pagsuroy sa lainlaing mga dapit sa rehiyon, ilang nakita nga daghang mga basakan ang gihimo na nga subdivision o residential areas.

“Nagkagamay na lang tawon ang yuta nga tamnan nato og humay kay nagsige og tukod og balay. Mabuhi ta kung way balay, pero dili ta mabuhi kon way pagkaon,” padayag ni Diputado dihang nahinabi sa Superbalita Cebu kagahapon.

Ang regional director nipasidaan nga istrikto nila nga ipatuman ang insakto nga pag-reclassify sa luna alang sa agrikultura diin kon makita nila nga tambukon ang yuta, dunay irigasyon ug gibakbakan og graba o filling materials kay dili nila tugotan. (SCG)


VIEW COMMENTS